Toshkent viloyati Angren shahrida hayvonlarga nisbatan shafqatsiz munosabatda bo‘lgani haqida xabar berildi. Holat yuzasidan Toshkent viloyati IIBB izoh berdi.
Ma’lum qilinishicha, 17-may kuni qarovsiz hayvonlarni himoya qilish bo‘yicha faollar guruhi, “Mehr va Oqibat” nodavlat tashkiloti Angren shahridagi uysiz hayvonlarni ushlash xizmati xodimlarining noo‘rin harakatlari sabab o‘zining Telegram kanalida murojaat qilgan.
Ushbu holat Angren shahar IIB tomonidan o‘rganilib, tegishli chora ko‘rildi.
Xususan, Angren shahar 5/4 dahasi, 4-uyda joylashgan shahar Obodonlashtirish boshqarmasi huzuridagi Egasiz, yovvoyi va qarovsiz hayvonlarni ushlash bo‘limi va ushbu boshqarma rahbari B.M. va uning qo‘l ostida ishlovchi T.A., T.S. va O.P. bilan holat yuzasidan surishtiruv o‘tkazildi.
Ushbu fuqarolarning xatti-harakatida Ma’muriy javobgarlik to‘g‘risidagi kodeksning 111-moddasida (hayvonlarga nisbatan shafqatsiz munosabatda bo‘lish) ko‘rsatilgan huquqbuzarlik mavjudligi sababli, boshqarma boshlig‘i B.M.ga nisbatan tegishli hujjatlar rasmiylashtirildi. Xizmat xodimlariga kelgusida o‘z xizmat vazifasidan chetga chiqmasdan xizmat olib borishlari haqida qattiq ogohlantirildi.
Shuningdek, olingan ma’lumotga ko‘ra Olmaliq shahrida bu kabi holat kuzatilmagan.
Ma’lumot uchun, yuqoridagi modda bo‘yicha aybdor deb topilgan shaxsga bazaviy hisoblash miqdorining bir baravaridan uch baravarigacha (245 ming so‘mdan 735 ming so‘mgacha) miqdorda jarima solishga sabab bo‘ladi.
Xuddi shunday huquqbuzarlik ma’muriy jazo chorasi qo‘llanilganidan keyin bir yil davomida takror sodir etilgan bo‘lsa, — bazaviy hisoblash miqdorining uch baravaridan besh baravarigacha (735 ming so‘mdan 1 million 225 ming so‘mgacha) miqdorda jarima solishga yoki o‘n besh sutkagacha ma’muriy qamoqqa olishga sabab bo‘ladi.
Bundan avval Ekologiya qo‘mitasi Bo‘stonliqda “Qizil kitob”ga kiritilgan ayiq rossiyalik ovchi tomonidan o‘ldirilishiga nega ruxsat berilganiga izoh bergandi, Toshkentda mushukni polietilen paketga solib, chiqindiga tashlagan erkakka nisbatan chora ko‘rilgani hamda Toshkentda o‘q bilan yaralangan it topilgani haqida xabar berilgandi.
Izoh (0)