“Uch bolam bilan ko‘chada qoldirdi”. O‘zbekistondagi eng qimmat klipmeyker Narimon Sultonxo‘jayev kam aliment to‘lash uchun o‘zini qorovul qilib ko‘rsatgani aytilmoqda (video)

O‘zbekistondagi xizmat haqi eng qimmat hisoblanadigan klipmeyker Narimon Sultonxo‘jayev rafiqasi va uch nafar farzandini ko‘chaga haydab, buning ustiga kam aliment to‘lash uchun firma qorovuli sifatida hujjat rasmiylashtirgani aytilmoqda. Bu haqda uning sobiq rafiqasi Malika Sultonxo‘jayeva Instagram’dagi sahifasida so‘zlab bergan. 

 


“Izohlarda siz Narimon Sultonxo‘jayevning xotinimisiz, deb so‘rayapsizlar. Biz anchadan beri birga yashamayapmiz. 10 yil deganda bitta sabab tufayli ulardan ketdim. Hozirgi paytda men uch bolam bilan ko‘chada qoldim. Onamlarnikida yashayapman. Ular tomonidan umuman moddiy yordam bo‘lmayapti. Shu o‘rinda prezidentimizga bitta savolim bor: Nimaga ayol kishi uch farzandi bilan ham ko‘chada qolishi mumkin? Ya’ni onasinikida, akasinikida sarson bo‘lib yashashi mumkin ekan. Erkak kishi ajrashayotganida rafiqasi va bolalarini uy bilan ta’minlashi kerak, degan qonun yo‘q. Faqat aliment undirish ko‘zda tutilgan. Sobiq turmush o‘rtog‘im firmaga qorovul sifatida ishga o‘tgani to‘g‘risida ma’lumotnoma to‘g‘rilab, hozirda uch bolaga 750 ming so‘m aliment to‘lab kelyapti. Sobiq turmush o‘rtog‘im Narimon Sultonxo‘jayev bizni uysiz qoldirdi, buning ustiga kam aliment to‘layapti”, — deydi Malika Sultonxo‘jayeva. 

Ma’lumot uchun, Narimon Sultonxo‘jayev Mahmud Namozov, Munisa Rizayeva, Shohruhxon, Lola, Nilufar Usmonova hamda boshqa san’atkorlarning qo‘shiqlariga kliplar suratga olgan. Uning “Ko‘za afsonasi”, “Sekin-asta”, “Nima qilish kerak?”, “Jani”, “Bo‘ldi” kabi qo‘shiqlarga ishlangan kliplari tomoshabinlarga manzur bo‘lgan.