Aktyor, klipmeyker Nurimon Sultonxo‘jayev ismini o‘zgartirgani, nima sababdan kliplarida o‘zi suratga tushishi, eng qimmat narxdagi kliplarini qaysi xonandanlarga ishlab bergani, Mahmud Namozovning “Ko‘za” taronasiniga klip suratga olish jarayonlari, qaysi kliplari “kuyib ketgani” va ularni qayta suratga olgani haqida gapirdi.
Nurimon Sultonxo‘jayev ismini o‘zgartirishiga nima sabab bo‘lgani haqida
“O‘zim ham hayron qoldim, taqdir ekan. Birinchi 3-4 ta ilmli insonlardan Narimon emas, Nurimon deb eshitdim, keyin shu narsa tushimga ham kirib chiqdi. Shunaqa bo‘lishi kerak ekan deb, tug‘ilganlik haqida guvohnomamni, pasportimni, hujjatlarimni o‘zgartirdim. Narimon deb chaqirishlari mumkin, lekin menga ko‘proq Nurimon ismi to‘g‘ri kelar ekan. Aniq biror narsani sabab qilib ko‘rsata olmayman.
Ism insonning hayotida katta rol o‘ynaydi, qachondir bitta harf ham taqdirni o‘zgartirishi mumkin ekan. Keyinchalik tushunib yetdim, ismimning ma’nosi ‘Iymon nuri’ bo‘larkan”, — deydi klipmeyker.
Klipmeyker nima sababdan kliplarida o‘zi suratga tushishi to‘g‘risida
“Klipda o‘zim ham suratga tushishim haqida taklif Ulug‘bek Rahmatullayevning ‘Bemor’ klipida bo‘lgan. Klipdagi voqealarni xonandaga aytib berayotgan vaqtim, xuddi klipdagidek men bunaqa klip olmayman deb aytdi. Keyin fikrlarimni aytayotgan vaqtim, klipda o‘zim ham suratga tushishim haqida taklif berdi. Shu bilan klip suratga olindi. Keyin boshqa kliplardan ham shu bo‘yicha buyurtma oldim. ‘O‘zingiz suratga tushmasangiz, klip oldirmayman’, deganlar ham bo‘ldi. Bir xil joylarda haqiqatan ham o‘zimni ko‘raman va suratga tushishimni aytaman”, — deydi Nurimon Sultonxo‘jayev.
Nurimon Sultonxo‘jayev eng qimmat narxdagi kliplarini qaysi xonandanlarga ishlab bergani haqida
“Munisa Rizayevaning ‘Sekin-asta’, yaqinda suratga olingan Ozod Xurramovning ‘Mandarin’ taronasiga ishlangan klipi ijodimdagi eng qimmat kliplar.
Shunday xonandalar borki, kompaniyalar uchun olinadigan videroliklar bilan bir xil narx to‘laydi. Ayrim kompaniyalar esa videoni vaqtini kamaytirib kamroq pul to‘laydi. Biroq reklama roliklari ijod emas. Bunday roliklarini ham qilib turish kerak, o‘ziga xos punktuallikni ushlab turadi. Reklama roligi ham oson narsa emas, 30 sekundda insonlarning miyasiga ko‘p ma’lumotni yetkazish kerak bo‘ladi”, — deydi klipmeyker.
Mahmud Namozovning “Ko‘za” taronasiniga suratga olingan klip jarayonlari to‘g‘risida
“Bu qo‘shiqning xit bo‘lishi yoki bo‘lmasligini bilmadim, lekin bu qo‘shiq chiqmagan ham bo‘lar edi. Mahmud Namozov uni aytib ‘berkitib’ qo‘ygan ekan. Bir kuni u insonning ukasi, administratori O‘ktam aka oldimga kelgan. Noutbuk bilan diskda shu qo‘shiqni olib kelishgan. ichida yana 3-4 ta qo‘shiq ham bo‘lgan. “Ko‘za”ni eshitdim, shu qo‘shiqqa klip olaylik deb aytdim. Chunki qo‘shiqning boshi insonni ilhomlantirib qo‘ydi. Keyin O‘ktam aka: ‘Mahmud aka bu qo‘shiqdan uyalyapti, aytgisi kelmayapti’, deb aytdi.
Mahmud aka sezgan ekan, u qo‘shiqni uydan chiqib ketib oyoq kiyimlarini bog‘layotgan vaqtda ilhomi kelib yozgan ekan. Keyin qo‘shiqni aytib ulfatlariga eshittirganida yoshing katta shunaqa qo‘shiq aytma deyishgan. Mahmud aka oldimga kelganidan keyin: ‘Bu qo‘shiqning zo‘rligini bilardim, shunga klip oling’, deb aytdi. Shu bilan oxirigacha bo‘lib ketdi”, — Nurimon Sultonxo‘jayev.
Klipmeyker qaysi kliplari “kuyib ketgani” va qayta suratga olgani haqida
“Menda ham material ‘kuyib’ ketib, qayta suratga olgan kliplarim bor. Mashhurlaridan ustozim Bahodir Yo‘ldoshev bilan Sankt-Peterburgda “Chaynvaem”ning klipini olganmiz, o‘shanda klipni yarim materiali yonib ketib chiqara olmaganmiz. Hech kim uni qayta tiklay olmagan, qaytadan olganmiz. O‘zimizning gonorardan tikib, klipni olib topshirganmiz. Doimiy emas, umumiy ikki marta bo‘lgan ekan. Shu dars bo‘lgan, klipni olib bo‘lgandan keyin darrov nusxa qildiraman. Hayot tajribasi, suratga olish tugadimi, tez nusxalash kerak”, — deydi klipmeyker.
Mavzuga doir:
Izoh (0)