Prezident Shavkat Mirziyoyev 3-iyul kuni “Toshkent shahri Chilonzor tumanining sanoat salohiyati va investitsiya jozibadorligini oshirishga doir qo‘shimcha chora-tadbirlar to‘g‘risida”gi qarorni imzoladi. “Daryo” qonun hujjatini o‘rganib, yaqin ikki yil ichida ushbu hududda qanday o‘zgarishlar bo‘lishi kutilayotgani tahlil qiladi.
320 gektarli “Industrial hudud”
Chilonzor tumanidagi “Beshqo‘rg‘on” va “Tirsakobod” mahallalari hududida joylashgan 320 gektar maydonda 30 yil muddatga kichik sanoat zonasi maqomidagi “Industrial hudud” tashkil etiladi. Uni rivojlantirishning asosiy yo‘nalishlari quyidagilar bo‘ladi:
- hududning sanoat salohiyatini oshirish, yuqori texnologiyalarga asoslangan ishlab chiqarishlarni tashkil etish;
- yuqori qo‘shilgan qiymatga ega mahsulotlarni ishlab chiqarish uchun to‘g‘ridan-to‘g‘ri investitsiyalar jalb qilish;
- energiya tejamkor, ekologik xavfsiz ishlab chiqarish quvvatlarini barpo etish;
- hududda transport, muhandislik, yo‘l infratuzilmasini rivojlantirish orqali tadbirkorlik subyektlari loyihalarini amalga oshirishga ko‘maklashish;
- korxonalarda “amaliy monomarkazlar” tashkil etish orqali tadbirkorlik subyektlari uchun malakali mutaxassislar tayyorlash tizimini yo‘lga qo‘yish.
200 million dollarlik mehmonxona
“Bunyodkor” stadioni avtoturargohining jami 5,5 gektar yer uchastkasida qiymati kamida 200 million dollar bo‘lgan mehmonxona, savdo va xizmat ko‘rsatish obyektlari, ko‘p kvartirali uylar va ko‘p qavatli avtoturargohni o‘z ichiga olgan zamonaviy ishbilarmonlik markazi quriladi.
Vazirlar Mahkamasi va Toshkent shahar hokimligi 2023-yil yakuniga qadar zamonaviy ishbilarmonlik markazini qurish loyihasini amalga oshirish uchun yer uchastkalarini loyiha tashabbuskorlariga o‘rnatilgan tartibda ajratib beradi.
Kollej maydonida “amaliy monomarkaz”
Ikki oy muddatda “Diyor” mahallasidagi Toshkent xodimlarni boshqarish va mehnatni muhofaza qilish kolleji binosining bo‘sh turgan maydonlari yoshlar va xotin-qizlarni zamonaviy kasblarga o‘qitish maqsadida “amaliy monomarkaz” tashkil qilish uchun ijara stavkasining minimal miqdori bo‘yicha tadbirkorlik subyektlariga tanlov asosida ijaraga beriladi.
Ikkita yangi transformator
Tumanda yuklamalarni taqsimlash, yangi investitsiya loyihalarini amalga oshirish, shu bilan birga, aholini uzluksiz elektr energiyasi bilan ta’minlash maqsadida “Ruboiy” nimstansiyasida 1 ta 40 ming kVt quvvatli hamda “Chilonzor” nimstansiyasida 1 ta 25 ming kVt quvvatli qo‘shimcha yangi transformatorlar o‘rnatiladi.
Sayilgohlar tashkil etiladi
Tuman hududidan oqib o‘tuvchi “Bo‘rijar” kanalining ikki yon atrofini obodonlashtirish orqali kanal atrofida aholi dam olish maskani va sport maydonchalari, umumiy ovqatlanish va savdo shoxobchalarini o‘z ichiga olgan gastronomik ko‘cha (sayilgoh) tashkil etiladi.
Bundan tashqari, Bunyodkor shohko‘chasi yon qismidan Toshkent avtomobil halqa yo‘ligacha oqib o‘tuvchi 4,1 kilometr uzunlikdagi Qonqus va Angor kanalining Chilonzor tumani Kichik halqa yo‘lidan Naqqoshlik ko‘chasigacha oqib o‘tuvchi 1,7 kilometr uzunlikdagi qismi obodonlashtiriladi va sayilgoh tashkil etiladi.
Shuningdek, Chilonzor tumani mahallalari hududidagi 10 sotixdan kam bo‘lmagan bo‘sh yer maydonlarida kichik bog‘lar va sayilgohlar tashkil etiladi.
Chilonzor City
Zamonaviy turar joy majmualaridan iborat “Chilonzor City” loyihasini amalga oshirish bo‘yicha yer maydonlari chegaralariga aniqlik kiritilib, aniq hisob-kitoblar asosida Vazirlar Mahkamasiga taklif kiriladi.
Yangi yo‘l o‘tkazgich
Bunyodkor shoh ko‘chasi va 2-Qatortol ko‘chalari kesishgan chorrahada muntazam vujudga kelayotgan tirbandlikni inobatga olgan holda, ushbu chorrahada zamonaviy yo‘l o‘tkazgich qurish loyihasi amalga oshiriladi.
Izoh (0)