Twitter’ga raqobatchi servis ishga tushirilmoqda

Meta kompaniyasi asosi Instagram’da bo‘lgan yangi servisni ishga tushirmoqda, deb xabar berdi BBC.

Threads deb nomlangan servis funksiyasi jihatidan Twitter’ga o‘xshaydi. Unda qisqa matnli xabarlarni almashish, ularga layk bosish yoki komment yozish mumkin bo‘ladi.

Dastur ActivityPub (ijtimoiy tarmoqlarni moslashtirishga yordam beradigan texnologiya) bilan birlashtirilgan. Bu foydalanuvchilarga o‘z akkauntlari va obunachilarni ActivityPub’ni qo‘llab-quvvatlaydigan boshqa dasturlarga o‘tkazish imkonini beradi.

Ko‘pchilik taniqli shaxslar yangi dasturga allaqachon qiziqish bildirmoqda. Ular orasida: DJ Slime, Opra Uinfri va Dalay Lama bor. Dasturni 6-iyuldan boshlab AppStore’da yuklab olish mumkin bo‘ladi.

O‘tgan hafta Twitter foydalanuvchilarning kuniga o‘qishi mumkin bo‘lgan tvitlar sonini vaqtincha cheklagan edi. 

Endilikda oddiy akkauntga ega foydalanuvchilar kuniga 1000 tadan ko‘p bo‘lmagan xabarlarni o‘qiy oladi. Yangi akkauntlar uchun limit kuniga 500 ta tvit bo‘ladi. Verifikatsiya belgisiga (“Ko‘k galochka”) egalar uchun bu ko‘rsatkich 10 mingta xabarni tashkil qiladi.

“Ko‘k belgi”ni sotib olish oyiga 8 dollar, iPhone foydalanuvchilari uchun esa 11 dollar turadi. 

Bu o‘zgarish ko‘plab foydalanuvchilarning tanqidiga sabab bo‘ldi.