AQSH prezidenti Jo Bayden Yens Stoltenbergdan keyin NATO bosh kotibi lavozimiga Yevrokomissiya prezidenti Ursula fon der Lyayen nomzodini ilgari surmoqda. Bu haqda The Telegraph nashri NATO doiralaridagi ismi oshkor etilmagan suhbatdoshiga tayanib xabar berdi.
4-iyul kuni NATO bosh kotibi Yens Stoltenberg alyans rahbari lavozimida yana bir yil, 2024-yil 1-oktabrgacha qolishini ma’lum qildi.
64 yoshli Stoltenberg 2014-yilning oktabridan beri NATO bosh kotibi lavozimida ishlab kelmoqda. Uning vakolatlari kuzda tugashi kerak edi, ammo NATO a’zolari Stoltenbergdan o‘z lavozimida qolishni so‘ragan, ular Ukrainadagi urush fonida yangi nomzod bo‘yicha kelisha olmagan.
Fon der Lyayenning o‘zi NATO rahbari lavozimiga nomzodlar ro‘yxatiga kiritilganini katta sharaf deb bilishini aytgan. Biroq u “hozir ham, kelgusida ham” bu lavozimni egallash niyatida emas, dedi uning matbuot kotibi.
Shunga qaramay, mish-mishlarga ko‘ra, Yevrokomissiya rahbari Bayden bilan shaxsiy suhbatlarda “kamida keyingi yilga qadar” NATOda birorta lavozimni egallashga tayyor emasligini aytgan, deb yozadi The Telegraph. Oq uy Fon der Lyayenni ushbu lavozimga ko‘tarish imkoniyati 2024-yilda Yevrokomissiya rahbari uchun saylovdan keyin ochiladi, deb kutmoqda.
Izoh (0)