Xitoy rahbari Si Szinpin Rossiya prezidenti Vladimir Putinni Ukrainada yadro qurolidan foydalanish oqibatlari haqida shaxsan ogohlantirgan. Bu haqda The Financial Times gazetasi G‘arb va Xitoy rasmiylari orasidagi manbalarga tayanib xabar bermoqda.
Nashrning yozishicha, Xitoy rahbari bu haqda mart oyida Moskvaga davlat tashrifi chog‘ida Putin bilan yolg‘iz gaplashganda aytgan.
Xitoy hukumatining sobiq amaldori ham Si Szinpin Putinga yadro qurolidan foydalanmaslik haqida shaxsan aytganini tasdiqlab, Xitoyning yadrodan foydalanishga qarshi pozitsiyasi Pekinning Ukraina bo‘yicha tinchlik rejasiga kiritilganini qayd etdi.
Xitoy 24-fevral kuni Ukrainadagi mojaroni hal qilish bo‘yicha o‘zining tinchlik rejasini taqdim etgandi. Hujjatda keltirilgan 12 bandli qadamlar ichida yadroviy, kimyoviy yoki biologik qurollardan foydalanish tahdidiga qarshi kurash ham joy olgan.
Xitoy hukumatidagi yuqori martabali maslahatchining so‘zlariga ko‘ra, Putinni yadro qurolidan foydalanish oqibatlari haqida ogohlantirish Xitoyning Yevropa Ittifoqi bilan aloqalarni tiklash harakatida markaziy o‘rin tutgan.
Anonim qolishni istagan yana bir xitoylik amaldorning aytishicha, Rossiyaning Ukrainaga yoki uning Yevropadagi ittifoqchilaridan biriga potensial yadroviy zarbasi qit’ani Xitoyga qarshi qilib qo‘yishi mumkin, Pekinning bunday hujumga yo‘l qo‘ymaslik uchun ko‘rsatayotgan bosimi esa Yevropa bilan munosabatlarni yaxshilashga yordam beradi.
Mart oyida Xitoy rahbari ikki kunlik tashrif bilan Moskvada bo‘ldi. Xususan, 20-mart kuni Si Szinpin Vladimir Putin bilan norasmiy uchrashuv o‘tkazdi.
Izoh (0)