“Toshkent shahar Chilonzor tumanining sanoat salohiyati va investitsiya jozibadorligini oshirishga doir qo‘shma chora-tadbirlari to‘g‘risida”gi prezidenti qarori qabul qilindi.
Hujjat bilan Investitsiyalar, sanoat va savdo vazirligi hamda Toshkent shahar hokimligining Chilonzor tumani “Beshqo‘rg‘on” va “Tirsakobod” mahalla fuqarolar yig‘inlari hududida joylashgan 320 gektar maydonda 30 yil muddatga kichik sanoat zonasi maqomidagi “Industrial hudud” tashkil etish to‘g‘risidagi taklifiga rozilik berildi.
Shuningdek, poytaxt hokimligining “Bunyodkor” stadioni avtoturargohining jami 5,5 gektar yer uchastkasida qiymati kamida 200 million dollar bo‘lgan mehmonxona, savdo va xizmat ko‘rsatish obyektlari, ko‘p kvartirali uylar va ko‘p qavatli avtoturargohni o‘z ichiga olgan zamonaviy ishbilarmonlik markazini qurish loyihasini amalga oshirish to‘g‘risidagi taklifi ma’qullandi.
Bundan tashqari, 2023—2024-yillarda Bo‘rijar kanalining ikki yoni obodonlashtirilib, gastronomik sayilgoh tashkil etiladi. Bunga budjetdan 40 milliard so‘m ssuda ajratiladi. Anhor kanalining Kichik halqadan Naqqoshlik ko‘chasigacha bo‘lgan qismi — 1,7 kilometrda sayilgoh tashkil etiladi (17 milliard). Qonqus kanalining 4,1 kilometr qismida ham sayilgoh tashkil etiladi (28 milliard).
“Bunyodkor” stadioni
“Bunyodkor” stadioni 34 ming tomoshabinga mo‘ljallangan bo‘lib, u 2012-yil avgustda foydalanishga topshirilgan (qurilish ishlari 2009-yilda boshlangan edi). Stadionning ochilish marosimi 2012-yil 28-sentabrda bo‘lib o‘tgan.
“Bunyodkor” stadionidagi ilk rasmiy o‘yin esa 2013-yil 26-martda O‘zbekiston hamda Livan terma jamoalari o‘rtasida bo‘lib o‘tgan.
2018-yilda O‘FA tashabbusi bilan “Bunyodkor” deb atab kelingan o‘yingoh nomi “Milliy stadion”ga o‘zgartirilgandi. O‘sha vaqtda arena O‘zbekiston milliy va Olimpiya terma jamoasi ishtirokidagi hamda xalqaro maqomdagi o‘yinlarga mezbonlik qilishi va mamlakatning bosh o‘yingohiga aylanishi aytilgandi. 2021-yil 30-aprel kuni esa stadion peshtoqidan “Milliy” nomi olib tashlangan va “Bunyodkor” so‘zi o‘rnatilgan.
Izoh (0)