Farg‘onada ekspertiza xulosasini ijobiy qilish evaziga 2 million so‘m pora so‘ragan shifokorga sud hukmi o‘qildi, deb xabar beradi O‘zA.
Ma’lum qilinishicha, Farg‘ona shahrida davlat muassasasining mansabdor shaxsi o‘ziga berilgan narkologiya ekspertizalarini o‘tkazish va xulosalar berish, ekspertiza o‘tkazilishini nazorat qilish kabi vakolatlardan foydalanib, noqonuniy yo‘llar bilan boylik orttirmoqchi bo‘lgan.
Marg‘ilon shahar IIB huzuridagi tergov bo‘limi tergovchisi G‘.A.ning ish yurituvidagi jinoyat ishi bo‘yicha fuqaro X.A.ga nisbatan chiqarilgan qarorga asosan sudga oid narkologiya ekspertizasi tayinlangan. Shifokor N.A. o‘z xizmat vakolatidan kelib chiqib, sud narkologiya ekspertizasidan o‘tish maqsadida kelgan X.A.ni ekspertiza ko‘rigidan o‘tkazib, uni giyohvandlik moddasi isteʼmol qilishga ruju qo‘yganini, unga nisbatan majburiy tibbiy davolanishga muhtojligi haqida xulosa berilishini, agarda 2 million so‘m pul bersa ekspertiza xulosasini ijobiy hal qilib berishini aytgan.
Shundan keyin X.A. tomonidan huquqni muhofaza qiluvchi organlarga berilgan arizaga asosan shifokor-narkolog xizmat xonasida kimyoviy ishlov berilgan 1,5 million so‘mni olgan vaqtida ushlangan.
Holat yuzasidan jinoyat ishi qo‘zg‘atilib, tergov harakatlari olib borilgan. Mazkur jinoyat ishi sud tomonidan ko‘rib chiqilib, sudlanuvchi N.A.ga Jinoyat Kodeksining 210-moddasi (pora olish) 2-qismi “v” bandi bilan aybli deb topilib, ikki yil mansabdorlik va moddiy javobgarlik lavozimlarida ishlash huquqidan mahrum qilingan hamda Jinoyat Kodeksining 57-moddasi qo‘llanib, 3 yil 6 oy ozodlikdan mahrum qilish jazosi tayinlangan.
Sud hukmidan norozi bo‘lib yozgan shifokor ayolning apellyatsiya shikoyati Farg‘ona viloyati sudi jinoyat ishlari bo‘yicha sudlov hayʼati apellyatsiya instansiyasida ko‘rib chiqilib, sudning hukmi o‘zgarishsiz qoldirilgan.
Shifokorlar bilan bog‘liq poraxo‘rlik holatlari
2022-yil yanvarda Buxoroda shifokor fuqaroni hamshiralikka ishga joylashtirish evaziga undan 1 000 dollar pora olayotganda ushlangan edi. Buxoroda shunday holat 2021-yilning oktabrida ham yuz bergandi. Shahardagi 3-son poliklinika bosh shifokori fuqaroni hamshiralikka ishga joylashtirish evaziga ayoldan 600 AQSH dollari olayotganida qo‘lga olingan.
O‘sha yilning dekabrida Romitan tumanidagi ko‘p tarmoqli markaziy poliklinikada faoliyat yuritib kelayotgan shifokor nogironlik nafaqasini rasmiylashtirib berish evaziga fuqarodan 500 AQSH dollari olganida ushlangandi.
2022-yilning fevralida Qashqadaryo viloyati Shahrisabz tuman ko‘p tarmoqli markaziy poliklinikasi bosh shifokori 2 ming dollar bilan qo‘lga tushgandi.
Izoh (0)