Ozarbayjon prezidenti Ilhom Aliyev Fransiya Qorabog‘dagi arman ayirmachilarini qo‘llab-quvvatlayotganini aytdi. Uning fikricha, Parij mintaqada “g‘azabni qo‘zg‘atadigan yangi mustamlakachilik siyosatini” joriy etishga urinmoqda.
Aliyevning aytishicha, Fransiya “o‘zini inson huquqlari va xalqaro huquq himoyachisi sifatida ko‘rsatib”, boshqa davlatlarning ichki ishlariga aralashmoqda. Fransuz qo‘shinlarining Mali va Burkina-Fasodan olib chiqilishi “Afrikada Fransiyaning neokolonializm siyosati barbod bo‘lishga mahkum ekanini” ko‘rsatdi.
“Afsuski, Fransiya Ozarbayjonning Qorabog‘ mintaqasida arman separatizmini qo‘llab-quvvatlab, xuddi shu yovuz amaliyotni Janubiy Kavkazda joriy etishga urinmoqda”, — dedi Ilhom Aliyev Qo‘shilmaslik harakati muvofiqlashtiruvchi byurosining Bokudagi vazirlar yig‘ilishida
Aliyev, shuningdek, Fransiyada “ayrim etnik ozchiliklarga qarshi irqchilik va diskriminatsion nutqlar” tobora ko‘proq eshitilayotganini aytdi. U mahalliy amaldorlar va mamlakat parlamenti a’zolari “irqchilikka qarshi nafratli nutqlar” so‘zlayotganini ta’kidladi.
“Ajdodlari mustamlaka qilingan, qul qilib ishlatilgan, o‘ldirilgan, qiynoqqa solingan va xo‘rlangan millionlab odamlardan kechirim so‘rash Fransiyaning nafaqat tarixiy aybini tan olish bo‘ladi, balki unga jazoirlik o‘smirning shafqatsizlarcha o‘ldirilishidan keyingi chuqur siyosiy, ijtimoiy va gumanitar inqiroz oqibatlarini yengib o‘tishga yordam beradi”, — dedi Ozarbayjon rahbari.
27-iyun kuni Fransiyada norozilik namoyishlari boshlandi va ko‘plab shaharlarda tartibsizliklarga aylanib ketdi. Noroziliklarga Nanter shahrida 17 yoshli jazoirlik o‘smirning politsiya tomonidan o‘ldirilishi sabab bo‘ldi. Minglab odamlar hibsga olingan. Ularning aksariyati bolalar va yoshlardir. Dastlabki hisob-kitoblarga ko‘ra, tartibsizliklar tufayli Fransiya korxonalari va banklari 1 milliard yevrodan ortiq zarar ko‘rgan: 200 ta do‘kon to‘liq talon-toroj qilingan, 300 ta bank filiali shikastlangan. Fransiya prezidenti Emmanuel Makron shikastlangan barcha obyektlarni “tezroq tiklash uchun” favqulodda choralar ko‘rishga va’da berdi.
Izoh (0)