Озарбайжон президенти Илҳом Алиев Франция Қорабоғдаги арман айирмачиларини қўллаб-қувватлаётганини айтди. Унинг фикрича, Париж минтақада “ғазабни қўзғатадиган янги мустамлакачилик сиёсатини” жорий этишга уринмоқда.
Алиевнинг айтишича, Франция “ўзини инсон ҳуқуқлари ва халқаро ҳуқуқ ҳимоячиси сифатида кўрсатиб”, бошқа давлатларнинг ички ишларига аралашмоқда. Француз қўшинларининг Мали ва Буркина-Фасодан олиб чиқилиши “Африкада Франциянинг неоколониализм сиёсати барбод бўлишга маҳкум эканини” кўрсатди.
“Афсуски, Франция Озарбайжоннинг Қорабоғ минтақасида арман сепаратизмини қўллаб-қувватлаб, худди шу ёвуз амалиётни Жанубий Кавказда жорий этишга уринмоқда”, — деди Илҳом Алиев Қўшилмаслик ҳаракати мувофиқлаштирувчи бюросининг Бокудаги вазирлар йиғилишида
Алиев, шунингдек, Францияда “айрим этник озчиликларга қарши ирқчилик ва дискриминацион нутқлар” тобора кўпроқ эшитилаётганини айтди. У маҳаллий амалдорлар ва мамлакат парламенти аъзолари “ирқчиликка қарши нафратли нутқлар” сўзлаётганини таъкидлади.
“Аждодлари мустамлака қилинган, қул қилиб ишлатилган, ўлдирилган, қийноққа солинган ва хўрланган миллионлаб одамлардан кечирим сўраш Франциянинг нафақат тарихий айбини тан олиш бўлади, балки унга жазоирлик ўсмирнинг шафқатсизларча ўлдирилишидан кейинги чуқур сиёсий, ижтимоий ва гуманитар инқироз оқибатларини енгиб ўтишга ёрдам беради”, — деди Озарбайжон раҳбари.
27 июнь куни Францияда норозилик намойишлари бошланди ва кўплаб шаҳарларда тартибсизликларга айланиб кетди. Норозиликларга Нантер шаҳрида 17 ёшли жазоирлик ўсмирнинг полиция томонидан ўлдирилиши сабаб бўлди. Минглаб одамлар ҳибсга олинган. Уларнинг аксарияти болалар ва ёшлардир. Дастлабки ҳисоб-китобларга кўра, тартибсизликлар туфайли Франция корхоналари ва банклари 1 миллиард евродан ортиқ зарар кўрган: 200 та дўкон тўлиқ талон-торож қилинган, 300 та банк филиали шикастланган. Франция президенти Эммануэл Макрон шикастланган барча объектларни “тезроқ тиклаш учун” фавқулодда чоралар кўришга ваъда берди.
Изоҳ (0)