Toshkent shahrining Yakkasaroy tumanida Milliy gvardiya “Qo‘riqlash” bo‘limining tezkor harakatlanuvchi guruhi xodimlari ayolga tahdid qilgan erkakni ushladi. Bu haqda idora matbuot xizmati xabar berdi.
Qayd etilishicha, xodimlar xizmat vazifasini bajarayotib, Salor kanali yonida bir erkak va bir ayolga duch kelgan. Ushbu ikki nafar fuqaroning baland ovozdagi muloqoti va imo-ishoralariga ko‘ra o‘rtada mojaro kelib chiqqani ayon bo‘lgan.
Shundan so‘ng, fuqarolarga yaqinlashgan xodimlar erkak ayolga qo‘lidagi tig‘li buyum bilan tahdid qilayotganiga guvoh bo‘lgan. Fuqaro zudlik bilan qo‘lga olinib, ayol bilan birga vaziyatga oydinlik kiritish maqsadida eng yaqin ichki ishlar bo‘limiga olib ketilgan.
Hozirda mazkur holat yuzasidan Yakkasaroy tumani IIB tomonidan tergovga qadar tekshiruv harakatlari olib borilmoqda.
May o‘rtalarida Prezident tomonidan imzolangan qonun bilan Maʼmuriy javobgarlik to‘g‘risidagi kodeksga o‘zgartirishlar kiritilgandi. Unga ko‘ra, Milliy gvardiya organlari xodimlariga mayda bezorilik, sovuq qurol yoki sovuq qurol sifatida foydalanilishi mumkin bo‘lgan ashyolarni olib yurish, voyaga yetmagan shaxsni maʼmuriy huquqbuzarlik sodir etishga, g‘ayriijtimoiy xatti-harakatlarga jalb qilish, jamoat joylarida alkogol mahsulotlarini isteʼmol qilish kabi maʼmuriy huquqbuzarliklar bo‘yicha ishlarni ko‘rib chiqish, bayonnomalar tuzish va ularni ko‘rib chiqish uchun sudga yuborish bo‘yicha qo‘shimcha vakolatlar berilgan.
Izoh (0)