Jizzax viloyati hududidan o‘tuvchi “Manas” yo‘l-patrul xizmati maskanida YPX inspektorlari uzoq masofaga harakatlanuvchi haydovchilar uchun kofe-breklar tashkil etmoqda. Bu haqda Davlat yo‘l harakati xavfsizligi xizmati eʼlon qilgan videolavhada aytilgan.
Jizzaxda tungi vaqtda uzoq masofaga harakatlanayotgan haydovchilarga kofe va salqin ichimliklar ulashilmoqda. Viloyat YHXB katta inspetori Abbos Dadashevning aytishicha, bundan maqsad yo‘l-transport hodisalarini oldini olishdan iborat.
“Charchoq alomatlari bilan rul boshqarish yoki charchagan bo‘lsa-da avtomobil haydash oqibatida yo‘l-transport hodisasi sodir etish holatlarining oldini olish maqsadida ‘Manas’ yo‘l-patrul xizmati maskanida YPX inspektorlari tomonidan uzoq masofaga harakatlanuvchi haydovchilarga kofe-breklar tashkil etilmoqda. Shuningdek, ularga uzoq masofaga harakatlanayotgan vaqtda yo‘l qoidalariga rioya etish, charchoq alomatlari sezilganda esa to‘xtab dam olish bo‘yicha profilaktik suhbatlar olib borilmoqda”, — dedi u.
Maʼlumot uchun, O‘zbekistonda 2022-yil davomida jami 9 ming 902 ta YTH sodir bo‘lgan. Bunining oqibatida 2 ming 356 kishi vafot etgan, 9 ming 606 kishi turli darajalarda jarohatlangan.
Izoh (0)