“Маъмурий ислоҳотлар доирасида олий таълим, фан ва инновациялар соҳасида давлат бошқарувини самарали ташкил қилиш чора-тадбирлари тўғрисида”ги президент қарори қабул қилинди. Бу ҳақда Telegramъдаги “Ҳуқуқий ахборот” канали хабар берди.
Қарорга кўра, 2023/2024 ўқув йилидан академик лицейларга ўқувчиларни қабул қилишда ёзма имтиҳон асосида дастлабки саралаш босқичи бекор қилинади. Шунингдек:
- коллеж ва техникумларнинг таълим дастурларига давлат гранти асосидаги қабул кўрсаткичлари 2 бараварга оширилади;
- абитуриентларга “давлат гранти” ёки “таълим йўналиши” устуворликларидан бирини танлаш ва танлаган устуворлиги бўйича бакалавриат таълим йўналишлари кетма-кетлигида танловда иштирок этиш ҳуқуқи берилади;
- талабанинг таълим йўналишига мос стартап лойиҳаси ҳамда рационализаторлик ғоясини битирув малакавий иши ва магистрлик диссертацияси сифатида ҳимоя қилиш амалиёти жорий этилади;
- олий таълим муассасалари талабаларининг иқтисодиёт тармоқлари корхоналарида ҳақ тўланадиган қисқа муддатли мақсадли ишлаб чиқариш амалиётлари ташкил этилади.
Январь ўрталарида Ўзбекистондаги барча ОТМ, техникум ва академик лицейларнинг ўқиш бошлашга тайёрлиги ҳолати қайта мониторинг қилинаётгани тўғрисида хабар берилганди. Февралда эса Ўзбекистонда энди ўқувчилар коллеж ва техникумларга бир йилда икки марта қабул қилиниши айтилган эди.
Таъкидлаш керакки, 2022/2023-ўқув йили учун профессионал таълим муассасаларига сиртқи, кечки ва дуал таълим шакллари бўйича рўйхатдан ўтган абитуриентлар тест синовида иштирок этмаган. Улар профессионал таълим муассасалари (коллеж ва техникум)га кириш имтиҳонларисиз тўлов-контракт асосида қабул қилинади.
Изоҳ (0)