Checheniston rahbari Ramzan Qodirov Rossiya prezidenti Vladimir Putinni haqorat qilgan gruziyalik jurnalist Georgiy Gabuniyani o‘ldirishni buyurtma qilgani to‘g‘risidagi ayblovga izoh berdi.
“Aytishlaricha, bu safar Qodirovning buyurtmasi bilan gruziyalik jurnalistni o‘ldirmoqchi bo‘lgan yollanma qotilni qo‘lga olishibdi. Janoblar, ishoning, kimdir mening buyrug‘im bilan harakat qilsa, u, albatta, vazifani bajaradi. Agarda topshiriqni ovoz qilmay bajarish kerak bo‘lsa, hech kim, ayniqsa, turg‘unlikda qolib ketgan mamlakatlaringiz bundan xabar topmaydi”, — deb yozadi Qodirov o‘zining Telegram kanaliga.
Shuningdek, u Gabuniya tomonidan bildirilgan haqoratni unutmaganini ham ta’kidlab o‘tgan.
“Georgiy Gabuniya, avval ham aytganimdek, tiz cho‘kib, kechirim so‘ragani yaxshi… U bir kishini emas, butun rossiyaliklarni haqorat qildi. Gruziya hukumatidan ushbu fuqaroni qayta tarbiyalash borasida chora ko‘rishlarini so‘rayman. Unga to‘g‘ri xulosa chiqarish va aqlini yig‘ib olishini tavsiya qilaman. Aks holda, qaytaraman, u mening dushmanimga aylanadi”, — deydi Checheniston rahbari.
Eslatib o‘tamiz, “Rustavi 2” kanali boshlovchisi Georgiya Gabuniya 2019-yil iyul boshida efir vaqtida Rossiya prezidenti Vladimir Putinni haqorat qilgan edi. U ikki oyga efirdan chetlatilgan, ammo ishdan bo‘shatilmagan edi. Keyinroq Ramzan Qodirov Gabuniya teleboshlovchini ogohlantirgan edi.
Izoh (0)