Moldova poytaxti Kishinyovdagi aeroportda otishma sodir etgan Tojikiston fuqarosi Rustam Ashurov hibsga olish vaqtida olgan jarohatlari tufayli vafot etdi, deb xabar bermoqda Moldova Ichki ishlar vazirligi politsiya bosh inspeksiyasi.
Deutsche Welle xabariga ko‘ra, hibsga olish vaqtida Ashurov 10 ta o‘q yegan, kasalxonada o‘pkasining bir qismi olib tashlangan. Tojikistonlik hushiga kelmay vafot etgan.
Ashurov Kishinyovga Turkiyadan uchib kelgan. Politsiya maʼlumotlariga ko‘ra, u Dushanbeda uyushgan jinoiy guruh tarkibida “Orienbank” OAJ raisining birinchi o‘rinbosari Shuhrat Ismatullayevni o‘g‘irlashda ishtirok etganidan keyin boshpana qidirib kelgan. Ismatullayev 23-iyun kuni o‘g‘irlab ketilgandi. Tojikiston IIV o‘g‘irlangan shaxsni topishga yordam beradigan ma’lumot uchun 30 ming dollar mukofot e’lon qilgan, biroq hozircha bu natija bermagan.
Aeroportdagi otishma pasport nazorati xodimlari Ashurovning Moldovaga kirishiga ruxsat bermaganidan keyin boshlangan. Erkakning ortga qaytishini rasmiylashtirish uchun uni steril zonaga olib ketishga qaror qilingan, biroq u politsiyachining qurolini tortib olib, o‘q uzishni boshlagan.
Hodisada ikki kishi halok bo‘ldi: chegara politsiyasi va aeroport xavfsizligi xodimi, shuningdek, bir yo‘lovchi jarohat oldi. Erkak aeroport binolaridan birida garovga olinganlar bilan o‘zini to‘smoqchi bo‘lgan, biroq uni yaralab, hibsga olishgan.
Moldova prezident Mayya Sandu 4-iyulni qurbonlar xotirasiga milliy motam kuni deb e’lon qildi.
Izoh (0)