Хитойда 56 ёшли миллионер Лянг Ши университетга кириш учун 27 марта имтиҳон топширди ва яна муваффақиятсизликка учради. Бу ҳақда CNN хабар берди.
Эркак 40 йил давомида Хитой университетига кириш имтиҳонидан ўтишга ҳаракат қилмоқда. У бутун умри давомида зиёли сифатида тан олиниши учун нуфузли Сичуан университетида диплом олишни орзу қилган. Ши 1983 йилда биринчи “гаокао”дан (Хитой давлат университетига кириш имтиҳонидан) ўта олмади.
Биринчи муваффақиятсиз тажрибадан сўнг, бўлажак миллионер бир йилдан кейин яна уриниб кўришга қарор қилди, аммо бу ҳам иш бермади ва техник мактабга ўқишга кирди. Бироқ, у тез орада ўқишдан кетишга мажбур бўлди.
Ши кўп йиллар давомида кам маошли лавозимларда ишлаган, фабрикаларда оддий ишчи бўлган ва вақти-вақти билан имтиҳондан ўтишга ҳаракат қилган. 1992 йил у университетлардан бирига кириш учун етарли балл тўплади ва ўқишга кирди, лекин бу у хоҳлаган университет эмас эди ва у таълимдан бош тортди.
Кўп ўтмай, эркак “гаокао”да иштирок этиш учун ёш чегарасидан ошиб кетди, аммо 2001 йилда Хитой ҳукумати бу чекловни бекор қилди ва Ши ўз уринишларини давом эттиришга қарор қилди. 2010 йилдан бошлаб у ҳар йили имтиҳон топширди.
Шу йиллар давомида Ши ўз бизнесини, қурилиш материаллари заводини очишга муваффақ бўлди. У ўз корхонасидан миллионлаб юан ишлаб топди, лекин у ҳали ҳам университетда олий маълумотсиз тўлиқ бахтга эриша олмаслигига ишонади.
Сўнгги йилларда “гаокао” имтиҳонига тайёргарлик кўриш учун у бутун вақтини ўқишга бағишлаб, спиртли ичимликлар ва ўйин-кулгилардан бутунлай воз кечди. Ҳар куни эрталаб ўқиш учун чойхонага борар, ишдан кейин эса ўқишни давом эттириш учун қоларди.
Ҳар қанча уринмасин, Ши 2023 йил муваффақиятга эриша олмади ва ўтган сафаргидан 34 балл кам тўплади.
Изоҳ (0)