O‘zbekistonga Ispaniyadan Talgo kompaniyasining 4 ta tezyurar “Afrosiyob” elektropoyezdi keltiriladi, deb xabar bermoqda “Dunyo” AA.
Qayd etilishicha, O‘zbekiston elchisi Jahongir G‘aniyev Ispaniyaning Patentes Talgo kompaniyasi prezidenti Karlos Palasio Oriol bilan uchrashdi. Uchrashuvda Ispaniya tomoni O‘zbekiston bilan temiryo‘l transporti sohasida ko‘p yillik hamkorlikni davom ettirish hamda mavjud oltita Talgo-250 poyezdiga qo‘shimcha ravishda yana to‘rtta Afrosiyob tezyurar poyezdlarini yetkazib berishdan o‘ta manfaatdor ekanini ma’lum qildi.
Patentes Talgo prezidenti Daniya va Germaniya uchun 64 ta poyezd ishlab chiqarishda katta buyurtma bo‘yicha ishlar olib borilayotgani sababli ish yuki yuqori bo‘lishiga qaramay, kompaniya “O‘zbekiston temiryo‘llari” uchun to‘rtta Afrosiyob elektropoyezdini O‘zbekiston tomonidan rejalashtirilgan muddatlarda ishlab chiqarish va yetkazib berishni ta’minlashga tayyorligini alohida ta’kidlagan.
Buyurtmani Ispaniya hukumati huzuridagi Ispaniya kompaniyalarini xalqarolashtirish jamg‘armasi (FIEM)dan uzoq muddatli imtiyozli kreditlarni jalb qilgan holda moliyalashtirish uchun rejalashtirilgan.
2022-yilda “O‘zbekiston temiryo‘llari” 8 ta yangi yo‘nalishda temiryo‘l qatnovlari tashkil etish rejalashtirilayotgani, buning uchun 34 ta zamonaviy elektropoyezd xarid qilinishini ma’lum qilgandi.
Izoh (0)