Butun dunyoda bo‘lgani kabi O‘zbekistonda ham Qurbon hayiti uchun jonliq so‘yilib, qurbonlik qilinadi. Shu kunlar arafasida bozorlarda qo‘y va mollarga talab ortadi.
“Daryo” muxbiri Toshkent shahrida sotilayotgan qo‘ylar narxi bo‘yicha reportaj tayyorladi.
Chorvador Ziyodulla Muhammadjonovning aytishicha, har yili Qurbon hayiti uchun uyida bir nechta qo‘yni 1-1,5 yil boqib sotgani olib chiqadi.
“Bir kilo go‘sht 85-95 ming so‘mdan hisoblab sotilyapti. Xohlaganlar qo‘yni tiriklayin taroziga qo‘yib, qancha chiqsa undan 40 foizini chiqarib tashlab, 60 foizini kiloga chaqib, sotib oladi. Yana kimlardir shu turishida taxminan kiloga chamalab xarid qiladi”, — dedi u.
Bozordagilarning aytishicha, yemish narxlari oshgani uchun bu yil qo‘ylarning narxi ham biroz qimmatlagan.
“O‘rtacha, eng ko‘p sotiladigan 30-35 kilolik qo‘ylar 3-3,5 million so‘m atrofida sotilyapti. Nisbatan katta qo‘ylar kamroq ketadi. Oddiy kunlarda bir kilo go‘sht 78-80 ming so‘mgacha hisoblansa, Qurbon hayiti arafasida 100 ming so‘mgacha chiqib ketdi”, — dedi olibsotarlardan biri.
Bozorga har yili qo‘y boqib olib chiqadigan Sunnatilla Valiyevning aytishicha, qo‘yga bug‘doy, arpa va non berib boqadi.
“Taxminan 60 kilolik qo‘ylarimiz 5-5,5 million so‘m, ulardan sal kichikrog‘i 40 kilolik qo‘ylar 4-4,5 million so‘m bo‘lyapti”, — dedi Sunnatilla Valiyev.
Qashqadaryo viloyatining Chiroqchi tumanidan poytaxtga qo‘y olib kelib sotish bilan shug‘ullanadigan yigitning aytishicha, qo‘ylarning bir kilo go‘shti 90-100 ming so‘mdan hisoblab sotilyapti.
“Qo‘ylarimiz Qashqadaryo va Surxondaryo tog‘larida yurib semirgan. Eng katta 65-70 kilolik qo‘ylarimizga 7 million so‘m baho aytyapmiz, kami bor. O‘tgan yili bir kilo ko‘shtni 80 ming so‘m atrofida hisoblab sotgan edik”, — dedi chiroqchilik yigit.
Yana bir sotuvchining aytishicha, bu yil xaridorlar avvalgi yillarga qaraganda qo‘ylarni ko‘p sotib olayotgani yo‘q.
Izoh (0)