AQSHda Oq uyning ham, Kongressning ham reytingi juda past. Bu haqda “Amerika ovozi” muxbiri Navbahor Imamova “Daryo”ga ma’lum qildi.
Navbahor Imamovaning aytishicha, amerikaliklar harbiylarni ko‘proq qadrlaydi.
“Amerikaliklar boshqa jamiyatlar singari siyosatchilarga kamdan kam hollarda ishonishadi. Yaʼni Qo‘shma shtatlarda Oq uyning ham, Kongressning ham reytingi juda past. Masalan, Kongressning umumiy reytingi, odatda, 20-30 foiz orasida bo‘ladi. Bu mamlakatda eng yuqori reytingga ega siyosiy organ – Mudofaa vazirligi. Amerikaliklar o‘z harbiylarini qadrlashadi, ularga ishonishadi. Hazillashib ham, jiddiy ham aytamiz, chunki bu fakt, Amerikada ommaviy axborot vositalari va hokimiyatdagilarning reytingi past”, — deydi jurnalist.
Navbahor Imamovaning fikricha, Qo‘shma shtatlarda siyosiy faollik juda kuchli.
“Odamlar kuzatadi. Ommaviy so‘rovlar bejiz qilinmaydi. Chunki fuqaroning fikri muhim. Fuqaroning fikri ko‘p hollarda o‘sha saylov natijalarini ham aks ettiradi. To‘g‘ri, baʼzida kutilmagan natijalar ham bo‘lishi mumkin. Lekin baribir omma fikri oxirgi momentgacha jiddiy qabul qilinadi. Saylov vasvasasi boshlanishi bilan bu yerda hammaning og‘zida saylov bo‘ladi. Yaʼni fuqaro ogoh. Amerikaliklar talabchan, va muammolar ularni oyoqqa turg‘izadi. Siyosatchilariga nisbatan qanchalik ishonchsiz bo‘lmasin, kinoya va achchiq so‘zlar bilan ularni taʼriflashmasin amerikaliklar loqayd emas. Ular ertalabdan xabarlarni bilishni xohlashadi, qiziqishadi. Har soatda kunning dolzarb yangiliklari bilan tanishib borishadi. Men faqatgina poytaxtda yashayotgan amerikaliklarnigina nazarda tutmayapman, mamlakatning eng olis joylarida ham odamlar yangilikka, kim boshqaruvda ekani va u nima qilayotganiga qiziqishadi. Birinchi navbatda ular o‘zlarining mahalliy rahbarlarini, maʼmuriyatini savolga tutishadi, ulardan hisobot talab qilishadi”, — dedi “Amerika ovozi” muxbiri.
Avvalroq AQSHda 2024-yilning noyabr oyida prezidentlik saylovlari bo‘lib o‘tishi, hozirdanoq prezidentlikka daʼvogarlar “poygasi” boshlangani va ayni paytda ularning soni o‘n nafardan oshgani xabar qilingandi.
Izoh (0)