АҚШда Оқ уйнинг ҳам, Конгресснинг ҳам рейтинги жуда паст. Бу ҳақда “Америка овози” мухбири Навбаҳор Имамова “Дарё”га маълум қилди.
Навбаҳор Имамованинг айтишича, америкаликлар ҳарбийларни кўпроқ қадрлайди.
“Америкаликлар бошқа жамиятлар сингари сиёсатчиларга камдан кам ҳолларда ишонишади. Яъни Қўшма штатларда Оқ уйнинг ҳам, Конгресснинг ҳам рейтинги жуда паст. Масалан, Конгресснинг умумий рейтинги, одатда, 20-30 фоиз орасида бўлади. Бу мамлакатда энг юқори рейтингга эга сиёсий орган – Мудофаа вазирлиги. Америкаликлар ўз ҳарбийларини қадрлашади, уларга ишонишади. Ҳазиллашиб ҳам, жиддий ҳам айтамиз, чунки бу факт, Америкада оммавий ахборот воситалари ва ҳокимиятдагиларнинг рейтинги паст”, — дейди журналист.
Навбаҳор Имамованинг фикрича, Қўшма штатларда сиёсий фаоллик жуда кучли.
“Одамлар кузатади. Оммавий сўровлар бежиз қилинмайди. Чунки фуқаронинг фикри муҳим. Фуқаронинг фикри кўп ҳолларда ўша сайлов натижаларини ҳам акс эттиради. Тўғри, баъзида кутилмаган натижалар ҳам бўлиши мумкин. Лекин барибир омма фикри охирги моментгача жиддий қабул қилинади. Сайлов васвасаси бошланиши билан бу ерда ҳамманинг оғзида сайлов бўлади. Яъни фуқаро огоҳ. Америкаликлар талабчан, ва муаммолар уларни оёққа турғизади. Сиёсатчиларига нисбатан қанчалик ишончсиз бўлмасин, киноя ва аччиқ сўзлар билан уларни таърифлашмасин америкаликлар лоқайд эмас. Улар эрталабдан хабарларни билишни хоҳлашади, қизиқишади. Ҳар соатда куннинг долзарб янгиликлари билан танишиб боришади. Мен фақатгина пойтахтда яшаётган америкаликларнигина назарда тутмаяпман, мамлакатнинг энг олис жойларида ҳам одамлар янгиликка, ким бошқарувда экани ва у нима қилаётганига қизиқишади. Биринчи навбатда улар ўзларининг маҳаллий раҳбарларини, маъмуриятини саволга тутишади, улардан ҳисобот талаб қилишади”, — деди “Америка овози” мухбири.
Аввалроқ АҚШда 2024 йилнинг ноябрь ойида президентлик сайловлари бўлиб ўтиши, ҳозирданоқ президентликка даъвогарлар “пойгаси” бошлангани ва айни пайтда уларнинг сони ўн нафардан ошгани хабар қилинганди.
Изоҳ (0)