AQSHda o‘tkaziladigan har prezidentlik saylovlarida soxta ovozlar aniqlanadi. Bu haqda “Amerika ovozi” teleradiosi muxbiri Navbahor Imamova “Daryo” bilan suhbatda aytib o‘tdi.
Navbahor Imomovaning ta’kidlashicha, soxta ovozlar aniqlanadi, biroq ular saylov natijasiga ta’sir qiladigan darajada ko‘p bo‘lmaydi.
“O‘tgan 2020-yilgi prezidentlik saylovlarida soxta ovozlar aniqlangan. Keyin tekshiruvlar, sud ishlari bo‘ldi, xulosalar qilindi. Lekin saylov natijasiga taʼsir qila oladigan sonda emas. Albatta, u ovozlar hisobga olinmaydi. Shu paytgacha bu yerda saylov natijasiga taʼsir o‘tkaza oladigan darajadagi xatoliklar kuzatilmagan. Qo‘shma shtatlarda nafaqat soxta ovozlar, balki texnik xatolar ham uchraydi”, — dedi jurnalist.
Navbahor Imamovaning aytishicha, hozirda har bir shtatda ovoz berish huquqi bo‘yicha siyosat borligi ko‘p muhokama qilinadi.
“Yaʼni o‘sha shtatning parlamenti, Qonunchilar assambleyasi bu borada qator qoidalarni belgilagan va o‘ziga xos tartib joriy etilgan. Demokratlar ovozi ko‘proq kuzatiladigan, liberal ruhdagi shtatlarda, masalan, respublikachilar hokimiyatga kelganida ovoz berishni cheklovchi, yaʼni kim ovoz berishi mumkin degan savol muhokamaga chiqadi. Bu yerda huquq tashkilotlari ‘imkon qadar ovoz berish huquqi cheklanishiga harakat qiladi’, deb nola qilib keladi. Yaʼni agar respublikachilar hokimiyatga kelsa, o‘sha shtatda ovoz berish qiyinlashadi. Chunki respublikachilar u hududdagi ko‘pchilik hisoblangan demokratlarning ovozini bo‘g‘ishga harakat qiladi, degan masala federal miqyosda muhokamada. Yevropada xavfsizlik va hamkorlik tashkiloti boshqa aʼzo mamlakatlarda bo‘lganidek, bu yerga ham kelib, saylov jarayonini kuzatadi va tizimdagi qator xatolarni ochib beradi”, — dedi “Amerika ovozi” muxbiri.
Avvalroq AQSHda 2024-yilning noyabr oyida prezidentlik saylovlari bo‘lib o‘tishi, hozirdanoq prezidentlikka daʼvogarlar “poygasi” boshlangani va ayni paytda ularning soni o‘n nafardan oshgani xabar qilingandi.
Izoh (0)