AQSHda 2024-yilning noyabr oyida prezidentlik saylovlari bo‘lib o‘tadi. Oldinda saylovgacha bir yildan ortiq vaqt bo‘lsa-da, prezidentlikka daʼvogarlar “poygasi” hozirdan boshlangan. Ayni paytda ularning soni o‘n nafardan ortdi. Bu haqda “Daryo” uyushtirgan suhbatda “Amerika ovozi” teleradiosi muxbiri Navbahor Imamova ma’lum qildi.
Navbahor Imamovaning aytishicha, ayni paytda prezidentlikka da’vogarlar imkon qadar pul jamg‘arish payida.
“Chunki davlat bu yerda nomzodlarga pul ajratmaydi. Davlatning bu borada ishi yo‘q. Maxsus fondlar bor, ulardan pul olish mumkin. Lekin buning uchun ham oldin individual amerikaliklardan yetarlicha pul jamg‘arishi kerak. Deyarli har hafta, maydonga, ‘poyga’ga kimdir kirib kelyapti. Xususan, respublikachilardan. Demokratlardan kim prezidentlik uchun kurashishi aniq, bu — Jo Bayden. Respublikachilardan esa hozir kamida 12 kishi maydonda. Sobiq prezident Donald Trampdan tortib, uning sobiq vitse-prezidenti, uning qo‘lida ishlagan odamlar, qolaversa, ham Florida shtati gubernatori, ham u yerdagi yirik shahar Mayamining meri, Texas va boshqa qator shtatlardan daʼvogarlar bor” — dedi jurnalist.
Navbahor Imamovaning ta’kidlashicha, Amerikada prezidentlikka nomzodlar reytingi juda muhim.
“Bu yerda reytinglarni har kuni va har hafta o‘tkazishadi. Qo‘shma shtatlarda omma fikri doimiy ravishda o‘rganib boriladi. Prezidentning reytingiga qaraydigan bo‘lsak, Baydenning hozirgi reytingi 35-40 foiz orasida, shundan oshmayapti. Bu albatta, katta bir salbiy reallik. Lekin prezidentlik muddatining ikkinchi yarmida bunday hollar oldin ko‘p bo‘lgan. Shuning uchun Oq uy sarosima yoki vahimada emas. Hammasi yaxshi bo‘ladi, degan yondashuv bor. Bu borada prezident Bayden bag‘oyat bosiq. Donald Trampga kelsak, respublikachilar orasida uning reytingi ancha baland, aniqrog‘i 75-76 foizni tashkil qilyapti. Undan keyingilariniki 65-67 foiz, bu Florida shtati gubernatori Ron Desantis. U ikkinchi o‘rinda ketmoqda. Qolganlar ancha orqada”, — deydi “Amerika ovozi” muxbiri.
Izoh (0)