Aksariyat abituriyentlarga qaysi universitetga kirish yoki qanaqa yo‘nalishda o‘qishning ahamiyati yo‘q. Bu haqda Oliy taʼlim, fan va innovatsiyalar vazirligi departament boshlig‘i Abduvali Xoliqov “Daryo”ga bergan intervyusida ma’lum qildi. “O‘qishga ertani o‘ylab kirish kerak”, deydi mutaxassis.
Abduvali Xoliqovning aytishicha, hozirda 86 foiz atrofidagi bitiruvchilar o‘zi o‘qigan sohasi bo‘yicha ishlayapti.
“Lekin 14 foiz ham ko‘p. Joriy yil 150 ming talaba o‘qishni bitiradi. Bu ular orasidan 21 ming nafari o‘zi o‘qigan yo‘nalishda ishlamaydi degani. O‘sha 21 ming bola yoki ikkinchi mutaxassislikka topshiradi, yoki boshqa variant izlaydi. Bu yerda yo‘nalishlarni bozor va talabgor belgilab berishi kerak. Agar bizda qaysidir yo‘nalishlarga abituriyentlar soni kam bo‘lsa yoki ular to‘lmasa, o‘sha yo‘nalishga ehtiyoj yo‘q degani. Lekin buning uchun abituriyentlarda kasbga yo‘nalish fikri bo‘lishi kerak. Bugun tan olishimiz kerak, aksariyat abituriyentlarga qaysi OTMga kirish va qanaqa yo‘nalishda o‘qishning ahamiyati yo‘q. O‘qishga ertani o‘ylab kirish kerak. O‘shandagina biz qaysi yo‘nalishlarni yopib, qabulni to‘xtatishimiz kerakligi, qaysi yo‘nalishlarga talab ko‘p, kvotani oshirishimiz kerakligini aniq bilamiz. O‘zini aktivligini yo‘qotgan yo‘nalishlar faoliyatini to‘xtatish kerak. Mehnat bozori uchun yangi yo‘nalishlarni shakllantirish lozim. Va biz bu bo‘yicha ishlayapmiz” — dedi vazirlik vakili.
Abduvali Xoliqovning qo‘shimcha qilishicha, hozirda OTM bitiruvchilarini kamida ikkita sohada ishlaydigan mutaxassis qilib yetishtirish boshlangan.
“Maqsadimiz taʼlim yo‘nalishlari sonini kamaytirib, diplomda kvalifikatsiya berishni ko‘paytirish. Yaʼni bitiruvchilarni kamida ikkita sohada ishlaydigan mutaxassis qilib yetishtirishimiz kerak. Bu jarayon boshlangan. Masalan, Jahon tillari universitetining ispan tili yo‘nalishida o‘qigan bitiruvchini diplomiga ispan tili mutaxassisi deb yozib berilardi. U qishlog‘iga boradi, lekin biror joyda ispan tili yo‘qligi uchun ishlay olmasdi. Bugun esa ispan tilini tugatganlarga aytaylik, ikkinchi til sifatida ingliz tili o‘qitilgan bo‘lsa, ingliz tili mutaxassisligini qo‘shib yozib beryapmiz. Boryapti, ispan tili yo‘qmi, ingliz tilidan darsini beryapti. Bunga 4 yil bo‘ldi” — dedi u.
Abduvali Xoliqovga ko‘ra, hozir bu jarayon boshqa sohalarda ham kengaytirilmoqda. Masalan, muhandislik sohasida, pedagogikada matematika informatika bilan birlashtirilgan.
“Maktabda dars soatlari kam bo‘lgani uchun o‘qituvchi ham matematika, ham informatikadan dars bersin deb, yo‘nalishni matematika va informatika qildik. Yoki bo‘lmasa, fizika-astronomiya birlashdi. Bu sekin-asta optimallashib boryapti. Bitiruvchining ishlash imkoniyati kengroq bo‘lishi kerak” — dedi mutaxassis.
Izoh (0)