Amerikalik milliarder tug‘ilgan kunida avariyaga uchrab, vafot etdi

Amerikalik milliarder Jeyms Kroun 25-iyun kuni Koloradodagi poyga trassasida avariyaga uchradi. Bu haqda The Colorado Sun nashri xabar bermoqda.

Kron o‘zining 70 yoshga to‘lgan kunida avtomobil yo‘lida to‘siqqa urilib, vafot etdi, deyiladi xabarda.

“Biz Jimning oilasi va yaqinlariga ushbu og‘ir damlarda chuqur hamdardlik bildiramiz. U JPMorgan Chase’ning ajralmas bo‘lagi edi”, — dedi JPMorgan Chase bosh direktori Jeyms Daymon.

Chikago meri Brendon Jonson “Jim o‘zining saxiyligi bilan Chikago ruhini ko‘targanini” aytdi. AQSH prezidenti Jo Bayden ham milliarderning oilasiga hamdardlik bildirdi.

Jeyms Kron AQSHdagi eng yirik banklardan biri — JPMorgan Chase direktorlar kengashi a’zosi, shuningdek, otasi Genri Kron tomonidan asos solingan Henry Crown & Co investitsiya kompaniyasi prezidenti edi. Forbes 2020-yilda Kron oilasining boyligini 10,2 milliard dollarga baholagan.

2014-yilda Barak Obama Jeyms Kronni prezident huzuridagi razvedka bo‘yicha maslahat kengashiga tayinlagan edi. Milliarder, shuningdek, Aspen Skiing Co kompaniyasining boshqaruvchi hamkori, Fan va sanoat muzeyi, Fuqarolik qo‘mitasi va Chikago universiteti qoshidagi Aspen institutining faxriy raisi bo‘lgan.