Америкалик миллиардер туғилган кунида аварияга учраб, вафот этди

Америкалик миллиардер Жеймс Кроун 25 июнь куни Колорадодаги пойга трассасида аварияга учради. Бу ҳақда The Colorado Sun нашри хабар бермоқда.

Крон ўзининг 70 ёшга тўлган кунида автомобиль йўлида тўсиққа урилиб, вафот этди, дейилади хабарда.

“Биз Жимнинг оиласи ва яқинларига ушбу оғир дамларда чуқур ҳамдардлик билдирамиз. У JPMorgan Chase’нинг ажралмас бўлаги эди”, — деди JPMorgan Chase бош директори Жеймс Даймон.

Чикаго мери Брендон Жонсон “Жим ўзининг сахийлиги билан Чикаго руҳини кўтарганини” айтди. АҚШ президенти Жо Байден ҳам миллиардернинг оиласига ҳамдардлик билдирди.

Жеймс Крон АҚШдаги энг йирик банклардан бири — JPMorgan Chase директорлар кенгаши аъзоси, шунингдек, отаси Генри Крон томонидан асос солинган Henry Crown & Cо инвестиция компанияси президенти эди. Forbes 2020 йилда Крон оиласининг бойлигини 10,2 миллиард долларга баҳолаган.

2014 йилда Барак Обама Жеймс Кронни президент ҳузуридаги разведка бўйича маслаҳат кенгашига тайинлаган эди. Миллиардер, шунингдек, Аspen Skiing Cо компаниясининг бошқарувчи ҳамкори, Фан ва саноат музейи, Фуқаролик қўмитаси ва Чикаго университети қошидаги Аспен институтининг фахрий раиси бўлган.