Moskva va Pekin global tinchlikni ta’minlash hamda umumiy rivojlanishni rag‘batlantirishda muhim kuch sifatida ish olib bormoqda. Bu haqda Xitoy tashqi ishlar vaziri Sin Gan Rossiya Xalqaro ishlar kengashi va Xitoy Ijtimoiy fanlar akademiyasi tomonidan 26–27-iyun kunlari tashkil etilgan “Rossiya va Xitoy: yangi davrda hamkorlik” nomli VIII xalqaro konferensiyasi ishtirokchilariga yo‘llagan videomurojaatida aytib o‘tdi.
“Xitoy va Rossiya Birlashgan Millatlar Tashkiloti Xavfsizlik Kengashining doimiy aʼzolari bo‘lib, global tinchlik va taraqqiyotni taʼminlovchi muhim barqarorlashtiruvchi kuchdir”, — dedi Sin Gan.
BMT Xavfsizlik Kengashining doimiy a’zolari safida AQSH, Buyuk Britaniya va Fransiya ham bor.
O‘z navbatida, Rossiya tashqi ishlar vaziri Sergey Lavrov Moskva va Pekin dunyoga G‘arbning global hukmronlik siyosatiga konstruktiv alternativ taklif etishini hamda “barcha davlatlarning manfaatlarini, barcha xalqlarning madaniy va sivilizatsiyaviy o‘ziga xosligini hisobga olgan holda, ko‘p qutbli dunyo uchun shart-sharoitlarni shakllantirishga” hissa qo‘shishini aytdi.
Mart oyida Rossiya prezidenti Vladimir Putin Xitoy rahbari Si Szinpin bilan muzokaralar o‘tkazgan edi. Shundan so‘ng ikki davlat rahbarlarining qo‘shma bayonotida o‘zaro munosabatlar yangi davrga qadam qo‘yayotgani, mamlakatlar bir-birini ustuvor sheriklar sifatida ko‘rib, teng huquqli hamkorlik qilayotgani ta’kidlandi.
Izoh (0)