Ўзбекистонда Қурбон ҳайити куни қандай об-ҳаво бўлиши маълум қилинди

Ўзбекистон аҳолиси байрамни қулай об-ҳаво шароитида кутиб олади, деб хабар бермоқда “Ўзгидромет”.

Маълум қилинишича, 26 июнь, душанба куни республика бўйича ҳарорат 30-33 даража, жанубда 39-41 даража салқин об-ҳаво сақланиб туради. 27—30 июнь кунлари ҳаво ҳарорати бир оз кўтарилади ва 34-37 даража, жанубда 39-41 даража атрофида бўлади.

Фақат шанба ва якшанба кунлари 1—2 июлда Ўзбекистон ҳудудига иссиқ ҳаво кириб келиши кучаяди ва кундузги ҳарорат яна 38-40 даражагача, жанубда баъзи жойларда 42 даражагача кўтарилади.

Ушбу ҳафтанинг охиригача республика бўйича ҳаво асосан кам булутли бўлади, ёғингарчилик кутилмайди, фақат Фарғона водийси ҳудудлари билан чегарадош тоғолди ва тоғли ҳудудларда 26—28 июнь кунлари баъзи жойларда қисқа муддатли ёмғир ёғиши, момақалдироқ бўлиши мумкин.

26 июнда шимолда, 27—29 июнда республикада баъзи жойларда шамол тезлиги 13-18 метр/секундгача кучайиши, айрим жойларда чанг-тўзон билан кузатилиши мумкин.

Тошкентда ҳаво бир оз булутли бўлади, вақти-вақти билан ўзгариб туради, ёғингарчилик кутилмайди. Ҳарорат 26 июнь кундузи 32-34 даража, 27—30 июнда 34-37 даража, 1—2 июлда 37-40 даража бўлади.

Ўзбекистонда Қурбон ҳайитининг биринчи куни 28 июнь кунига тўғри келиши ҳақида эълон қилинганди. Байрам муносабати билан аҳоли кетма-кет 5 кун дам олади.