Грецияда 25 июнь, якшанба куни бўлиб ўтадиган такрорий парламент сайловларида собиқ бош вазир Кириакос Мицотакиснинг ҳукмрон консерватив “Янги демократия” партияси ғалаба қозонди. Мамлакат Ички ишлар вазирлиги маълумотларига кўра, бюллетенларнинг 99,61 фоизи санаб чиқилгач, партия 40,55 фоиз овоз тўплагани маълум бўлди.
Иккинчи ўринни 17,84 фоиз овоз билан собиқ бош вазир Алексис Ципраснинг сўл қанот мухолиф “СИРИЗА” партияси эгаллади. Учинчи ўрин сўл марказчи “ПАСОК” партиясига насиб қилди (11,85 фоиз).
Греция сайлов қонунчилигига кўра, биринчи ўринни қўлга киритган партия камида 20 та қўшимча депутатлик мандатини олади. Бу шуни англатадики, “Янги демократия” Греция парламентида мутлақ кўпчиликни қўлга киритиши мумкин — тахминан 300 та ўриндан 158 та.
Май ойида ўтказилган сайловлар билан ҳукуматни шакллантириб бўлмади
Бу Грецияда сўнгги беш ҳафта ичида иккинчи парламент сайлови. 21 май куни бўлиб ўтган аввалги овоз бериш натижаларига кўра, 40,79 фоиз овоз билан “Янги демократия” ғалаба қозонган. Бироқ ўша пайтда ўнг марказчилар коалицион ҳукумат туза олмаган ва бу такрорий сайловлар белгиланишига олиб келди.
Грецияда консерваторлар 2019 йилдан буён мамлакатни бошқариб келмоқда.
Изоҳ (0)