Gretsiyaning Tempi shahri yaqinida yuk va yo‘lovchi poyezdi to‘qnashib ketdi, deb xabar bermoqda EPT nashri.
To‘qnashuv yarim tunda Evangelizmos stansiyasida sodir bo‘lgan, yo‘lovchi poyezdining uchta vagoni relsdan chiqib ketgan va yong‘in boshlangan. Voqea sabablari hozircha ma’lum emas. Iefimerida yozishicha, noma’lum sabablarga ko‘ra ikkala poyezd ham bitta relsda yo‘lga chiqqan.
Fessaliya gubernatori so‘zlariga ko‘ra, yo‘lovchi poyezdining birinchi va ikkinchi vagonlari butunlay vayron bo‘lgan. “Barcha (yo‘lovchilar) chiqarib olindi. Qutqaruvchilar, afsuski, hozir faqat halok bo‘lganlarni qidirmoqda”, — dedi u. Poyezdda jami 350 kishi bo‘lgan, deya xabar beradi Hellenic Train.
O‘lganlar va yaralanganlarning aniq soni dastlab noma’lum edi: Ta Nea gazetasi kamida 10 qurbon haqida, EPT 15 kishi halok bo‘lgani va kamida 50 kishi yaralangani haqida, Iefimerida 19 qurbon va 60 yarador haqida xabar berdi. Keyinroq o‘t o‘chirish xizmatining rasmiy vakili Vassilis Vatrakoyannis 26 kishi halok bo‘lgani, 85 kishi jarohatlangani, ulardan 25 nafarining ahvoli og‘ir ekanini aytdi.
To‘qnashuv joyida politsiya, o‘t o‘chiruvchilar va harbiylar ishlamoqda, deb yozadi iEidiseis. Afina va Saloniki harbiy gospitallari yaradorlarni qabul qilish zarurati ehtimolidan tayyor holatga keltirilgan.
Izoh (0)