Suriyalik faollarning xabar berishicha, mamlakat shimoli-g‘arbida jangarilar nazorati ostidagi Idlib viloyatiga Rossiya aviazarbalari oqibatida kamida 13 kishi halok bo‘ldi, ular orasida bolalar ham bor. Havo hujumlaridan biri Jisr ash-Shugur shahridagi gavjum bozorga uyushtirilgan, buning oqibatida kamida 9 kishi, jumladan, ikki bola halok bo‘lgan, deb ma’lum qildi Suriya Inson huquqlari observatoriyasi (SOHR).
Idlib chekkasiga uyushtirilgan hujumda yana to‘rt kishi halok bo‘lgan, jumladan, o‘lganlar orasida jihodchi jangari ham bor, deydi SOHR. Rossiya havo reydlarida, shuningdek, 30 kishi jarohatlangan. Qurbonlar soni ortishi kutilmoqda.
Asosi Buyuk Britaniyada joylashgan SOHR Suriyadagi faollar tarmog‘iga tayanib, ma’lum qilishicha, ushbu hodisa yil boshidan beri eng qonli aviazarba bo‘lgan.
Jisr ash-Shugur shahar fuqarolik mudofaasi vakili Ahmad Jasigining AFP axborot agentligiga aytishicha, zarar ko‘rgan bozor qishloq xo‘jaligi bilan shug‘ullanuvchi mahalliy aholi uchun muhim daromad manbai edi.
AFP maʼlumotlariga ko‘ra, Suriyada 2011-yildan beri davom etayotgan jangovar harakatlar oqibatida 500 mingga yaqin odam halok bo‘lgan, mamlakat aholisining yarmiga yaqini uylarini tashlab ketgan.
Izoh (0)