Germaniya hukumati Ukraina armiyasi ehtiyojlari uchun artilleriya o‘q-dorilarini yetkazib berish bo‘yicha uzoq muddatli dasturni qabul qilmoqchi. Bu haqda Spiegel xabar berdi.
Ma’lum qilinishicha, hozirda hujjatlarni muvofiqlashtirish va rasmiylashtirish davom etmoqda. Jurnalistlar o‘tgan hafta Germaniya Mudofaa vazirligi qurol ishlab chiqaruvchi Rheinmetall kompaniyasi bilan kelishuvni Bundestag budjet qo‘mitasiga tasdiqlash uchun taqdim etganini aniqladi. Hujjat 2029-yilgacha 333 ming tagacha 155 millimetr artilleriya o‘q-dorilarini yetkazib berishni nazarda tutadi.
Bu snaryadlar nemis armiyasining omborlariga boradi, ammo Ukraina uchun harbiy yordam paketlari ushbu zaxiralardan ajratilishi kutilmoqda.
Xususan, Ukraina Qurolli kuchlari uchun keyingi ikki yil uchun 20 ming dona snaryaddan iborat birinchi paket berish allaqachon kelishib olingan. Ushbu partiya uchun deyarli 60 million yevrolik xarajatlar Germaniya federal hukumati tomonidan qoplanadi.
Germaniya armiyasi ham birinchi partiyada 20 ming snaryad oladi. m155 millimetr snaryadlarni sotib olish bo‘yicha ushbu shartnoma nafaqat Ukrainaga keyingi yetkazib berish uchun, balki Germaniya armiyasining o‘zini mustahkamlash uchun ham zudlik bilan zarur. Hozirgi kunga qadar Bundesverning omborlarida atigi 20 mingta shunday kalibrli o‘qlar bor.
Maxfiy hujjatga ko‘ra, Kiyev qo‘shimcha o‘q-dorilarni birinchi paket yetkazib berilgandan keyin ham, dastur ishga tushirilgandan so‘ng ham buyurtma qila oladi.
“Bu shartnomaning o‘zi shuni ko‘rsatadiki, Berlinda hech kim Ukrainadagi janglar tezda tugashini kutmaydi”, — deb yozadi Spiegel.
Bugungi kunga qadar Germaniya Ukrainaga kalibrli 25 mingga yaqin artilleriya o‘q-dorilarini yetkazib bergan. Xuddi shu hajmdagi yana bir transh kelgusi haftalarda frontga kelishi kutilmoqda.
Shunga qaramay, Ukrainaning haqiqiy ehtiyojlari juda katta. Germaniya Mudofaa vazirligi ekspertlari Ukraina armiyasi har oyda 200 mingdan 300 minggacha artilleriya snaryadlari ishlatishini aytdi.
Izoh (0)