Германия ҳукумати Украина армияси эҳтиёжлари учун артиллерия ўқ-дориларини етказиб бериш бўйича узоқ муддатли дастурни қабул қилмоқчи. Бу ҳақда Spiegel хабар берди.
Маълум қилинишича, ҳозирда ҳужжатларни мувофиқлаштириш ва расмийлаштириш давом этмоқда. Журналистлар ўтган ҳафта Германия Мудофаа вазирлиги қурол ишлаб чиқарувчи Rheinmetall компанияси билан келишувни Бундестаг бюджет қўмитасига тасдиқлаш учун тақдим этганини аниқлади. Ҳужжат 2029 йилгача 333 минг тагача 155 миллиметр артиллерия ўқ-дориларини етказиб беришни назарда тутади.
Бу снарядлар немис армиясининг омборларига боради, аммо Украина учун ҳарбий ёрдам пакетлари ушбу захиралардан ажратилиши кутилмоқда.
Хусусан, Украина Қуролли кучлари учун кейинги икки йил учун 20 минг дона снаряддан иборат биринчи пакет бериш аллақачон келишиб олинган. Ушбу партия учун деярли 60 миллион евролик харажатлар Германия федерал ҳукумати томонидан қопланади.
Германия армияси ҳам биринчи партияда 20 минг снаряд олади. м155 миллиметр снарядларни сотиб олиш бўйича ушбу шартнома нафақат Украинага кейинги етказиб бериш учун, балки Германия армиясининг ўзини мустаҳкамлаш учун ҳам зудлик билан зарур. Ҳозирги кунга қадар Бундесвернинг омборларида атиги 20 мингта шундай калибрли ўқлар бор.
Махфий ҳужжатга кўра, Киев қўшимча ўқ-дориларни биринчи пакет етказиб берилгандан кейин ҳам, дастур ишга туширилгандан сўнг ҳам буюртма қила олади.
“Бу шартноманинг ўзи шуни кўрсатадики, Берлинда ҳеч ким Украинадаги жанглар тезда тугашини кутмайди”, — деб ёзади Spiegel.
Бугунги кунга қадар Германия Украинага калибрли 25 мингга яқин артиллерия ўқ-дориларини етказиб берган. Худди шу ҳажмдаги яна бир транш келгуси ҳафталарда фронтга келиши кутилмоқда.
Шунга қарамай, Украинанинг ҳақиқий эҳтиёжлари жуда катта. Германия Мудофаа вазирлиги экспертлари Украина армияси ҳар ойда 200 мингдан 300 минггача артиллерия снарядлари ишлатишини айтди.
Изоҳ (0)