Turk lirasi AQSH dollariga nisbatan tarixdagi eng past ko‘rsatkichga tushdi

Turk lirasi yana bir bor o‘zining tarixiy eng past ko‘rsatkichini yangiladi. Xalqaro Forex bozorida 1 AQSH dollari deyarli 26 liraga yetdi.

Turkiya Markaziy bankining milliy valyutani qo‘llab-quvvatlashga qaratilgan bank sohasidagi talablarni yumshatish to‘g‘risidagi qarori fonida lira zaiflashmoqda, deb yozdi Reuters.

Milliy valyuta uchun yana bir salbiy omil Turkiya Markaziy bankining valyuta kursini boshqarish uchun valyuta zaxiralaridan foydalanishdan bosh tortgani bo‘ldi.

Bloomberg hisob-kitoblariga ko‘ra, 18 oy davomida regulyator lira kursini barqarorlashtirish uchun taxminan 200 milliard dollar sarflagan. May oyi o‘rtalarida, prezidentlik saylovlari oldidan Turkiyaning sof xalqaro zaxiralari 2002-yil fevral oyidagi eng past darajaga tushib ketgandi.

Endi Turkiya Markaziy banki talablarni yumshatish orqali “an’anaviy” pul-kredit siyosatiga qaytish niyatini yana bir bor tasdiqladi. O‘tgan hafta Turkiya Markaziy banki 2021-yil mart oyidan beri birinchi marta asosiy stavkani yillik 8,5 foizdan 15 foizga oshirdi. Shu bilan birga, regulyator pul-kredit siyosatini qat’iylashtirishni davom ettirishga va’da berdi, ammo stavkani oshirish bo‘yicha qadamlar bosqichma-bosqich bo‘lishini ta’kidladi.