Shimoliy Koreya poytaxti Pxenyan shahrida Koreya urushi boshlanganining 73 yilligiga bag‘ishlab Amerikaga qarshi shiorlar ostida ommaviy mitinglar bo‘lib o‘tdi, deb xabar bermoqda Daily NK. Ma’lumotlarga ko‘ra, poytaxtdagi namoyishlarda 120 ming kishi qatnashgan.
Reuters tomonidan e’lon qilingan fotosuratlarda odamlar stadionda qo‘llarida: “Butun AQSH materiki bizning o‘q otish diapazonimizda” va “AQSH — dunyoni vayron qiluvchi” degan yozuvlarni ushlab turganini ko‘rish mumkin.
Daily NK gazetasining yozishicha, norozilik namoyishida Shimoliy Koreya Mehnat partiyasi markaziy qo‘mitasi kotibi, mamlakat bosh vaziri o‘rinbosari, shuningdek, mehnat tashkilotlari, fabrikalar vakillari va talabalar ishtirok etgan.
“Amerika imperializmi bilan hisob-kitob qilishni kechiktirmaslik bizning avlodimizning burchidir”, deya namoyishchilar bayonotidan iqtibos keltirdi Daily NK.
1950-yil 25-iyun kuni Shimoliy va Janubiy Koreya o‘rtasida boshlangan Koreya urushi 1953-yilning 27-iyulida sulh bitimining imzolanishi bilan yakunlandi. Shimoliy koalitsiya tarkibiga Shimoliy Koreya, Xitoy va SSSR kirgan. AQSH, Buyuk Britaniya va boshqa bir qator davlatlar BMT tinchlikparvar kuchlari tarkibida Janubiy Koreya tomonida harakat qilishdi.
Hozirda AQSH va Shimoliy Koreya rasmiy ravishda urush holatida, chunki mojaro sulh imzolanishi bilan yakunlangan. Urush rasman yakunlangani haqida e’lon qilinmagan.
Izoh (0)