“Hududiy elektr tarmoqlari”ning yagona aloqa markaziga bog‘lanish qiyinlashgan. Masʼullar buni qo‘ng‘iroqlar soni ortgani bilan izohlamoqda

O‘zbekistonning ko‘plab hududlarida elektr energiyasida uzilishlar kuzatilmoqda. Uzilishlar haqida baʼzan maʼlumotlar berilsa, baʼzida esa yo‘q. Fuqarolar “Hududiy elektr tarmoqlari” aksiyadorlik jamiyatining 1154 yagona aloqa markaziga telefon qilib, uzilishlar nima sababdan sodir bo‘lgani va qachon tiklanishi haqida maʼlumot olishi mumkin.

“Daryo” nashriga 1154 yagona aloqa markaziga telefon orqali ulanib bo‘lmayotgani yuzasidan ko‘plab murojaatlar kelib tushmoqda.

“Uzilishlar 10 soatgacha cho‘zilib ketmoqda. U paytda shahar elektr tarmoqlari korxonasiga bog‘lanib bo‘lmaydi. 1154 raqamiga ham o‘n kunlar avval tokdan uzilish bo‘lmaganida tusholmagan edim. Kechagi kuni yana tusholmadim. Baʼzan umuman qo‘ng‘iroq qilib tushib bo‘lmasa, baʼzida bir-ikki gudokdan keyin operator bilan ulanolmaysiz”, — dedi Toshkent viloyatining Yangiyo‘l shahridan murojaat yo‘llagan fuqaro.

Uning qo‘shimcha qilishicha, hozirgi kunda ko‘p qavatli uylarda suv taʼminoti elektrga bog‘liq. Shu boisdan tok uzilsa, suv ham bo‘lmaydi.

“Bu issiqda muzlatkichdagi oziq-ovqatlar aynib qolishi mumkin. Sovitish moslamalari bo‘lmasa, yoshi kattalar va go‘daklar issiqda qanday chidaydi. Buni kimdir o‘ylaydimi? Qishda havo sovuq keldi, yozda esa issiq keldi, deyishadi. Ha, desa “u yer portlab ketdi, bu yer yonib ketdi”, degan umumiy javobni berishadi. Masʼullar nimagadir tayyorgarlik ko‘rishadi?”, — dedi murojaatchi.

Yana bir murojaatchining “Daryo”ga maʼlum qilishicha, u o‘nlab urinishdan keyin 1154 raqamiga qo‘ng‘iroq qilib, operator bilan bog‘langan.

“Uyga kelsam, tok yo‘q ekan. 1154 ga qayta-qayta telefon qilib 10 minutda bog‘landim. Navbatim 78 ekan, operator javobini bir soat kutdim. Yaxshiyam telefonimning quvvati o‘sha vaqtgacha yetdi”, — dedi murojaatchilardan biri.

Holat yuzasidan “Hududiy elektr tarmoqlari” AJ boshqaruv raisining axborot siyosati bo‘yicha maslahatchisi Faxriddin Nuraliyevning “Daryo”ga maʼlum qilishicha, yagona aloqa markaziga qo‘ng‘iroqlar ko‘pligi bois bog‘lanish cheklanayotgan bo‘lishi mumkin.

“Ayni paytda olib borilayotgan ishlar sabab rejaviy uzilishlar bor. Shu sababli qo‘ng‘iroq qiluvchilar soni ham oshgan”, — dedi Faxriddin Nuraliyev.

Murojaatchilarning aksari tok uzilishi vaqtida oldindan ogohlantirilmaslik va o‘sha uzilishlarga kimdir aybdor bo‘lsa, unga nisbatan qanday jazo berilgani yuzasidan maʼlumot berilmasligini aytib o‘tgan.