“Ҳудудий электр тармоқлари”нинг ягона алоқа марказига боғланиш қийинлашган. Масъуллар буни қўнғироқлар сони ортгани билан изоҳламоқда

Ўзбекистоннинг кўплаб ҳудудларида электр энергиясида узилишлар кузатилмоқда. Узилишлар ҳақида баъзан маълумотлар берилса, баъзида эса йўқ. Фуқаролар “Ҳудудий электр тармоқлари” акциядорлик жамиятининг 1154 ягона алоқа марказига телефон қилиб, узилишлар нима сабабдан содир бўлгани ва қачон тикланиши ҳақида маълумот олиши мумкин.

“Дарё” нашрига 1154 ягона алоқа марказига телефон орқали уланиб бўлмаётгани юзасидан кўплаб мурожаатлар келиб тушмоқда.

“Узилишлар 10 соатгача чўзилиб кетмоқда. У пайтда шаҳар электр тармоқлари корхонасига боғланиб бўлмайди. 1154 рақамига ҳам ўн кунлар аввал токдан узилиш бўлмаганида тушолмаган эдим. Кечаги куни яна тушолмадим. Баъзан умуман қўнғироқ қилиб тушиб бўлмаса, баъзида бир-икки гудокдан кейин оператор билан уланолмайсиз”, — деди Тошкент вилоятининг Янгийўл шаҳридан мурожаат йўллаган фуқаро.

Унинг қўшимча қилишича, ҳозирги кунда кўп қаватли уйларда сув таъминоти электрга боғлиқ. Шу боисдан ток узилса, сув ҳам бўлмайди.

“Бу иссиқда музлаткичдаги озиқ-овқатлар айниб қолиши мумкин. Совитиш мосламалари бўлмаса, ёши катталар ва гўдаклар иссиқда қандай чидайди. Буни кимдир ўйлайдими? Қишда ҳаво совуқ келди, ёзда эса иссиқ келди, дейишади. Ҳа, деса “у ер портлаб кетди, бу ер ёниб кетди”, деган умумий жавобни беришади. Масъуллар нимагадир тайёргарлик кўришади?”, — деди мурожаатчи.

Яна бир мурожаатчининг “Дарё”га маълум қилишича, у ўнлаб уринишдан кейин 1154 рақамига қўнғироқ қилиб, оператор билан боғланган.

“Уйга келсам, ток йўқ экан. 1154 га қайта-қайта телефон қилиб 10 минутда боғландим. Навбатим 78 экан, оператор жавобини бир соат кутдим. Яхшиям телефонимнинг қуввати ўша вақтгача етди”, — деди мурожаатчилардан бири.

Ҳолат юзасидан “Ҳудудий электр тармоқлари” АЖ бошқарув раисининг ахборот сиёсати бўйича маслаҳатчиси Фахриддин Нуралиевнинг “Дарё”га маълум қилишича, ягона алоқа марказига қўнғироқлар кўплиги боис боғланиш чекланаётган бўлиши мумкин.

“Айни пайтда олиб борилаётган ишлар сабаб режавий узилишлар бор. Шу сабабли қўнғироқ қилувчилар сони ҳам ошган”, — деди Фахриддин Нуралиев.

Мурожаатчиларнинг аксари ток узилиши вақтида олдиндан огоҳлантирилмаслик ва ўша узилишларга кимдир айбдор бўлса, унга нисбатан қандай жазо берилгани юзасидан маълумот берилмаслигини айтиб ўтган.