Jizzax hokimligi Prado taʼmiriga 50 mln, O‘rta Chirchiq hokimligi Captiva’ga 30, Namangandagi GAI boshlig‘i esa 78 mln: mansabdorlar mashinasi taʼmiriga qancha sarflamoqda?

Mansabdorlar xizmatidagi avtomobillar taʼmiriga qancha mablag‘ sarflanmoqda? Telegram’dagi “revizor_uzb” kanali bu haqda maʼlumot berdi.

Qayd etilishicha, Jizzax viloyati hokimi Ergash Soliyev viloyat hokimligi balansidagi Toyota Prado avtomobilini taʼmirlatish uchun 50 million so‘m, Cadillac Escalade avtomobili uchun esa 15 million so‘m mablag‘ ajratish haqida farmoyish chiqargan.

Bu haqdagi farmoyishda hokim viloyat Moliya boshqarmasi boshlig‘i A.Rahmatullayevga topshiriq berib, har ikki avtomobil taʼmiri uchun sarflanishi ko‘zda tutilgan 65 million so‘m mablag‘ni mahalliy budjetning zaxira mablag‘lari hisobidan viloyat hokimligiga ajratishini tayinlagan.

Namangan viloyati Ichki ishlar boshqarmasi, Yo‘l harakati xavfsizligi boshqarmasi buyurtmachiligida taʼmirlangan Captiva uchun ham katta mablag‘ sarflangan. Davlat raqami 50 700 VSF bo‘lgan Captiva rusumli xizmat avtotransportini taʼmirlash uchun 78,3 million so‘m pul mablag‘ ajratilgan.

Toshkent viloyatining O‘rta Chirchiq tumani hokimligi tuman hokimining Captiva rusumli xizmat avtomobilini taʼmirlash uchun 30 million so‘m mablag‘ ajratgan.

Kambag‘allikni qisqartirish va bandlik vazirligiga tegishli davlat raqami 01 777 APC bo‘lgan Traverse rusumli xizmat avtotransportining moy almashtirishi hamda boshqa taʼmirlash ishlari uchun 17,1 million so‘m sarflangan.

“Kambag‘allikni qisqartirish va bandlik vazirligi tomonidan ushbu xizmat avtotransporti qachon xarid qilingani nomaʼlum — ochiq manbalarda maʼlumot yo‘q”, — deyiladi Telegram kanalidagi bu haqdagi xabarda.