O‘zbekistonning sobiq tashqi ishlar vaziri, Markaziy Osiyo xalqaro instituti direktori Vladimir Norov nafaqaga chiqdi. Bu haqda u Twitter’da yozib qoldirdi.
“Davlat idoralari va xorijiy diplomatik missiyalarda 45 yillik faoliyatimdan so‘ng nafaqaga chiqishga qaror qildim. Prezident Shavkat Mirziyoyev bu qarorimni qo‘llab-quvvatlaganidan chin dildan minnatdorman.
Men barcha aloqalarimdan O‘zbekiston tashqi siyosatini rivojlantirish, mamlakatning xalqaro nufuzini oshirish, O‘zbekiston va Markaziy Osiyo mintaqasi iqtisodiyotiga investitsiyalar, innovatsion texnologiyalar va raqamli yangiliklarni jalb qilishda foydalanish niyatidaman. Shu sababli men Silk Road Advisory konsalting kompaniyasini tashkil qildim”, — deb yozgan u.
Vladimir Norov 1955-yil 31-avgust kuni Buxoroda tug‘ilgan. 1972—1976-yillarda Buxoro pedagogika institutida o‘qigan. 1983—1985-yillarda Sovet Ittifoqi ichki ishlar vazirligi akademiyasi tinglovchisi bo‘lgan.
2019—2021-yillarda Shanxay hamkorlik tashkiloti bosh kotibi bo‘lib ishlagan. 2022-yil 27-apreldan tashqi ishlar vaziri etib tayinlangan va 30-dekabrdan vazir lavozimidan ozod qilingan.
Vladimir Norov 2023-yilning 10-yanvaridan buyon Markaziy Osiyo xalqaro instituti direktori lavozimida ishlab kelayotgandi.
Izoh (0)