Ўзбекистоннинг собиқ ташқи ишлар вазири, Марказий Осиё халқаро институти директори Владимир Норов нафақага чиқди. Бу ҳақда у Twitter’да ёзиб қолдирди.
“Давлат идоралари ва хорижий дипломатик миссияларда 45 йиллик фаолиятимдан сўнг нафақага чиқишга қарор қилдим. Президент Шавкат Мирзиёев бу қароримни қўллаб-қувватлаганидан чин дилдан миннатдорман.
Мен барча алоқаларимдан Ўзбекистон ташқи сиёсатини ривожлантириш, мамлакатнинг халқаро нуфузини ошириш, Ўзбекистон ва Марказий Осиё минтақаси иқтисодиётига инвестициялар, инновацион технологиялар ва рақамли янгиликларни жалб қилишда фойдаланиш ниятидаман. Шу сабабли мен Silk Road Advisory консалтинг компаниясини ташкил қилдим”, — деб ёзган у.
Владимир Норов 1955 йил 31 август куни Бухорода туғилган. 1972—1976 йилларда Бухоро педагогика институтида ўқиган. 1983—1985 йилларда Совет Иттифоқи ички ишлар вазирлиги академияси тингловчиси бўлган.
2019—2021 йилларда Шанхай ҳамкорлик ташкилоти бош котиби бўлиб ишлаган. 2022 йил 27 апрелдан ташқи ишлар вазири этиб тайинланган ва 30 декабрдан вазир лавозимидан озод қилинган.
Владимир Норов 2023 йилнинг 10 январидан буён Марказий Осиё халқаро институти директори лавозимида ишлаб келаётганди.
Изоҳ (0)