“Navoiyning 5 ta tuman va shahrida “Xamsa”dagi dostonlar nomi bilan ataladigan beshta ekobog‘ yaratsak, nima deysizlar?” – Shavkat Mirziyoyev

Prezidentlikka nomzod Shavkat Mirziyoyev navoiylik saylovchilar bilan uchrashuvda kelgusi yetti yilda aholining turmush sharoitlarini yaxshilashga oid rejalari bilan tanishtirdi.

Xususan, viloyatda 30 ming oilaga mo‘ljallangan 350 ta ko‘p qavatli uylar barpo etiladi. Shuningdek, 45 ming oila istiqomat qiladigan 1 ming 200 ta ko‘p qavatli uylar ta’mirlanadi.

Bundan tashqari, bu ishlarni amalga oshirish uchun barcha manbalar hisobidan Navoiy viloyatining o‘ziga 1 milliard dollar yo‘naltiriladi.

Bulardan tashqari:

• 3,5 ming kilometr ichki yo‘llar, 60 dan ziyod ko‘priklar quriladi va ta’mirlanadi;
• eskirgan 5 ming kilometr elektr tarmoqlari va 1 ming 200 ta transformator yangilanadi;
• 1 ming kilometr suv tarmoqlari o‘tkazilishi natijasida 100 ming aholi ilk bor ichimlik suvi bilan ta’minlanadi va suv ta’minoti darajasi 85 foizga yetadi.

Nomzod ekologiya to’g’risida gapirar ekan, Navoiyda ekologik vaziyatni yaxshilash maqsadida kelgusi yetti yilda 120 million tup daraxt ekilishini aytdi.

“Buyuk bobokolonimiz Navoiyga cheksiz hurmatimiz belgisi sifatida, viloyatning 5 ta tuman va shahrida “Xamsa”dagi dostonlar nomi bilan ataladigan beshta ekobog‘ yaratsak, nima deysizlar?”, – dedi nomzod.