O‘zbekiston liberal-demokratik partiyasidan prezidentlikka nomzod Shavkat Mirziyoyev navoiylik saylovchilar bilan uchrashuv chog‘ida kelgusi yetti yilda sanoatni rivojlantirishga oid rejalar haqida to‘xtaldi.
“Xorijiy hamkorlarimiz bilan birga, umumiy qiymati 120 milliard dollar bo‘lgan mega va yirik loyihalarni boshladik. Xususan, mamlakatimiz faxri bo‘lgan “Navoiy kon metallurgiya kombinati”da 3 milliard 800 million dollarlik 19 ta loyiha amalga oshiriladi.
Misol uchun, kuni kecha “Pistali koni”ning 1-bosqichi ishga tushirildi, yil yakunigacha 2-bosqichi ham foydalanishga topshiriladi. Ushbu loyiha hisobiga yiliga qo‘shimcha 4,4 tonna oltin ishlab chiqariladi”, — dedi nomzod.
Shavkat Mirziyoyevning aytishicha, “Navoiy uran”da 550 million dollarlik 11 ta loyihani amalga oshirish orqali, uran zaxiralari 67 ming tonnadan 100 ming tonnaga yetkaziladi.
“Umuman olganda, 2030-yilgacha mis ishlab chiqarish 3,5 barobar, oltin – 1,5 barobar, kumush – 3 barobar, uran – 3 barobarga oshiriladi”, – dedi nomzod.
Butun dunyoda talab oshib borayotgan, elektromobil, elektrotexnika, yashil energetika sohalari uchun muhim bo‘lgan litiy, grafit kabi xom ashyolarni ilk bor O‘zbekistonda ishlab chiqarish yo‘lga qo‘yiladi.
“Jumladan, Toshkent viloyatida yiliga 8 ming tonna litiy, Buxoroda 50 ming tonna grafit ishlab chiqariladi. Ohangarondagi mis, Bekoboddagi qora metall, Chirchiqdagi qishloq xo‘jaligi texnikasi klasterlarida 10 milliard dollarlik 46 ta korxona barpo etiladi”, – dedi nomzod.
Izoh (0)