Andijon viloyatining Paxtaobod tumanida fermer xo‘jaligiga qarashli dala maydonida ishlayotgan 3 kishini chaqmoq urdi. 17 yoshli yigit Baxtiyor Sohibjonov voqea joyida vafot etdi. Bu haqda “Daryo”ga viloyat Sog‘liqni saqlash boshqarmasi axborot xizmati xabar berdi.
Taʼkidlanishicha, voqea kecha, 19-iyun kuni soat taxminan 07:30 da sodir bo‘lgan.
Chaqmoq urishi natijasida 2006-yil tug‘ilgan bola va 2008-yilda tug‘ilgan qiz Paxtaobod tuman tibbiyot birlashmasining Jarrohlik bo‘limiga olib kelingan.
“Bola voqea joyida vafot etgan bo‘lgan. Chaqmoq urishi natijasida jarohat olgan qizning ahvoli tekshirilganda hushsiz ekani, chakka sohasidagi sochlari kuygani, badanida kuyish alomatlari borligi aniqlangan”, — deyiladi boshqarma axborotida.
“Daryo” muxbirining aniqlashtirishicha, chaqmoq chaqish holati yuz berganda voqea joyida uchinchi shaxs ham bo‘lgan. Ammo uning jarohatlari bo‘lmagani bois, shifoxonaga murojaat qilmagan.
Izoh (0)