Qashqadaryo televideniyesi mansabdorlariga nisbatan jinoyat ishi qo‘zg‘atilgan. Bu haqda viloyat prokurorining fuqaro murojaatiga javoban yo‘llangan javob xatida maʼlum qilingan.
Viloyat prokurori imzolagan javob xatida yozilishicha, TV mansabdorlari Jinoyat kodeksining 167-moddasi “v”, “g” bandlari (bir guruh shaxslar tomonidan oldindan til biriktirib, o‘zlashtirish yoki rastrata yo‘li bilan talon-toroj qilish) (mansab mavqeini suiisteʼmol qilish yo‘li bilan talon-toroj qilish) hamda 209-modda 1-qismi (mansab soxtakorligi) bilan ayblanmoqda.
“Murojaatingiz yuzasidan mutaxassislar ishtirokida o‘tkazilgan qayta o‘rganishda muassasada jami 81 million 500 ming so‘m mualliflik haqi, ish haqi va boshqa to‘lovlar noqonuniy to‘lanib, budjet mablag‘lari talon-toroj qilinganligi aniqlandi”, — deyiladi Qashqadaryo prokurorining murojaatchi Inobat Abdullayevga yo‘llagan javob xatida.
Inobat Abdullayevaning “Daryo”ga qo‘shimcha qilishicha, prokuratura aniqlagan 81 million 500 ming so‘m miqdoridagi gonorar televideniye bosh muharriri hamda bir nafar jurnalist uchun yozilgan noqonuniy gonorar miqdori hisoblanadi.
“Bu hali ikki kishiga yozilgan noqoununiy gonorar miqdori. Televideniyeda ishlayotganlarga yozilayotgan noqonuniy gonorarlarni hisob-kitob qilsa, qancha miqdordagi budjet puli noqonuniy to‘langanini bilib olish mumkin. Prokuratura tekshiruv jarayonlarini davom ettirishidan, davlat pullari talon-toroj qilinayotganini fosh etishidan umidvorman”, — deydi jurnalist.
Jurnalistning aniqlik kiritishicha, Qashqadaryo TVga bir yilda gonorarlar uchun budjetdan 2 milliard so‘m mablag‘ ajratiladi.
“Bosh muharrir va direktorga yaqin inson bo‘lsangiz, oddiy lavhangiz ham ko‘rsatuv sifatida baholanib, katta miqdorda pul yoziladi. Aksi bo‘lsa, yaxshi ko‘rsatuv ham lavha sifatida baholanib, kam miqdorda gonorar chiqadi. Eng qizig‘i bizda intervyu beruvchiga ham gonorar yoziladi, lekin hech qachon intervyu beruvchiga pul berilmaydi. Xo‘sh, o‘sha pul kimning cho‘ntagiga ketadi deb o‘ylaysiz? Isbot sifatida sizga Qashqadaryo televideniyesi direktori imzolagan va tasdiqlagan gonorarlar jadvalini beraman, o‘zingiz, ko‘rib xulosa chiqarasiz”, — deydi Inobat Abdullayeva.
Izoh (0)