Андижон вилоятининг Пахтаобод туманида фермер хўжалигига қарашли дала майдонида ишлаётган 3 кишини чақмоқ урди. 17 ёшли йигит Бахтиёр Соҳибжонов воқеа жойида вафот этди. Бу ҳақда “Дарё”га вилоят Соғлиқни сақлаш бошқармаси ахборот хизмати хабар берди.
Таъкидланишича, воқеа кеча, 19 июнь куни соат тахминан 07:30 да содир бўлган.
Чақмоқ уриши натижасида 2006 йил туғилган бола ва 2008 йилда туғилган қиз Пахтаобод туман тиббиёт бирлашмасининг Жарроҳлик бўлимига олиб келинган.
“Бола воқеа жойида вафот этган бўлган. Чақмоқ уриши натижасида жароҳат олган қизнинг аҳволи текширилганда ҳушсиз экани, чакка соҳасидаги сочлари куйгани, баданида куйиш аломатлари борлиги аниқланган”, — дейилади бошқарма ахборотида.
“Дарё” мухбирининг аниқлаштиришича, чақмоқ чақиш ҳолати юз берганда воқеа жойида учинчи шахс ҳам бўлган. Аммо унинг жароҳатлари бўлмагани боис, шифохонага мурожаат қилмаган.
Изоҳ (0)