Qashqadaryo viloyati Dehqonobod tumani “Otkamar” MFYda 9-mart kuni soat 11:45 da noqulay ob-havo sharoiti natijasida 3 nafar fuqaroni yashin urgani xabar qilingandi. “Daryo" muxbiri bilan suhbatlashgan tuman Favqulodda vaziyatlar bo‘limi xodimi O‘tkirbek Yo‘ldoshevning ma’lumot berishicha, chaqmoq urishi oqibatida vafot etgan va jarohat olganlar bir oila vakillari hisoblanadi.
“Ota ikki o‘g‘li bilan yashash xonadonidan 800 metr uzoqlikda yashovchi katta o‘g‘lini ko‘rish maqsadida yo‘lga chiqqan bo‘lgan. Yo‘lda ketishayotganda otani yashin urgan va yiqitgan. Yerda yotgan otani yashin urishda davom etayotganda o‘g‘li (1985-yilda tug‘ilgan) otasiga yordam berishga uringan. Yashin yordamga kelgan o‘g‘ilga ham zarar berib, uning 20-25 foiz kuyishiga sabab bo‘lgan. Boshqa bir o‘g‘il (1980-yilda tug‘ilgan) esa ko‘z o‘ngida bo‘layotgan voqealar sabab shokka tushgan”, — deydi O‘tkirbek Yo‘ldoshev.
Kuyish jarohatini olgan o‘g‘il Dehqonobod tuman tibbiyot birlashmasining jonlantirish bo‘limiga yotqizilgan. Ikkinchi o‘g‘ilga esa tibbiy yordam ko‘rsatilib, uyiga javob berilgan.
Eslatib o‘tamiz, yashin urishi oqibatida vafot etgan erkak 63 yoshda bo‘lgan. Hozirda holat yuzasidan surishtiruv ishlari olib borilmoqda.
Izoh (0)