O‘zbekiston bayrog‘ini xonadonlarga ilishga ruxsat berish ko‘zda tutilgan qonun loyihasi deputatlar tomonidan qabul qilindi

O‘zbekiston bayrog‘idan foydalanishdagi ayrim cheklovlar bekor qilinishi mumkinligi haqida xabar berilgan edi. 20-iyun kuni Oliy Majlis Qonunchilik palatasi deputatlari tegishli qonun loyihasini qabul qildi.

Davlat bayrog‘idan foydalanish bilan bog‘liq munosabatlarni yanada soddalashtirish, undan qonunga qat’iy rioya qilgan holda foydalanish imkoniyatlarini kengaytirish maqsadida bir guruh deputatlar tomonidan “O‘zbekiston Respublikasining Davlat bayrog‘i to‘g‘risida”gi O‘zbekiston Respublikasi qonuniga o‘zgartirish va qo‘shimchalar kiritish haqida”gi qonun loyihasi ishlab chiqilgandi.

Unda davlat bayrog‘idan sport musobaqalarida, ommaviy jismoniy tarbiya tadbirlarida, madaniy va o‘zga ommaviy tadbirlarda, oilaviy bayramlarda, xotiraviy sanalarni bayram qilishda hamda boshqa hollarda ham bayrog‘ga nisbatan zarur hurmatni ta’minlagan holda foydalanilishga ruxsat berish ko‘zda tutilmoqda.

Davlat ramziga zarur hurmat bilan muomala qilgan holda undan va uning tasviri tushirilgan belgilardan jamoat joylari va binolarda, yashash yoki ish joylarida hamda ularga tutash bo‘lgan hududlarda, transport vositalarining salonida foydalanish mumkinligi belgilanmoqda.

Shuningdek, davlat organlarining ramzlarida (bayroq, geraldik belgi) va ularning rasmiy veb-saytlarida davlat bayrog‘ining tasviri tushirilgan belgilardan foydalanishga huquqiy asos o‘rnatish hamda davlat bayrog‘i tasvirini ustki kiyimga bezatish maqsadida aks ettirish imkoniyatini yaratish nazarda tutilmoqda.

Davlat bayrog‘i va uning tasviri tushirilgan belgilardan quyidagi hollarda — O‘zbekiston Respublikasi vakili bo‘lgan jismoniy va yuridik shaxslar tomonidan rasmiy xalqaro tadbirlarda foydalanishda, harbiy yoki boshqa davlat xizmatida bo‘lgan shaxslar tomonidan kiyim-kechak va farqlovchi nishonlarda qo‘llashda hamda xalqaro sport musobaqalari hamda O‘zbekiston chempionatlari uchun sport kiyimlarini tayyorlashda foydalanishga ruxsat berish belgilanmoqda.

Shu bilan birga, davlat bayrog‘iga nisbatan hurmatsizlik bilan munosabatda bo‘linishiga yo‘l qo‘yilmaydigan hollar aniq belgilab berilmoqda.

Deputatlarning ta’kidlashicha, qonun loyihasining qabul qilinishi markaziy ko‘chalarda, maydonlarda, boshqa jamoat joylari va obyektlarda nafaqat bayram kunlari, balki kundalik hayotda ham davlatimiz bayrog‘ini ko‘rish, undan faxrlanish imkoniyatlarini kengaytiradi va uni milliy g‘urur timsoliga aylantiradi.