O‘zbekiston milliy terma jamoasi yordamchi murabbiyi Vlado Radmanovich CAFA Nations Cup—2023 finali doirasida o‘tadigan Eronga qarshi o‘yin oldidan o‘z fikrlari bilan o‘rtoqlashdi.
O‘yin haqida
Ikki terma jamoa ham final bahsiga loyiq edi. Eron terma jamoasi o‘z guruhida kamroq uchrashuv o‘tkazdi va shu sababdan ular tiklanish uchun ko‘proq vaqtga ega bo‘ldi. Eron kuchli terma jamoa, lekin biz raqibdan cho‘chimaymiz. Eronning hujum chizig‘i juda kuchli, bizning hujumchilar ham ulardan qolishmaydi. Uchrashuvda avvalambor aqlli o‘yin namoyish etishimiz kerak. Qiziq o‘yin bo‘lishiga ishonchim komil. Maydonda jang bo‘lishi aniq.
Eron terma jamoasidan qanday o‘yin kutayotgani borasida
Eron terma jamoasining o‘yinlarini tahlil qilib chiqdik. Raqib haqida barcha ma’lumotga egamiz, lekin Eron ham biz haqimizda ko‘p ma’lumotga ega. Erondan hujumkor o‘yin kutyapman, ularning hujumkor o‘yini bizga imkoniyatlar yaratadi.
Eronga qarshi o‘yinlarda darvoza tomon zarba berish qiyinligi haqida
Futbolda barchasini kichik detallar hal qiladi. Eron kabi terma jamoalarga qarshi o‘ynash har doim qiyin. Uchrashuvda raqib xatolaridan unumli foydalanishimiz kerak.
Imkoniyatlarni 60/40 baholagani borasida
Fikrim o‘zgarmadi. O‘yin natijasini taxmin qila olmayman, nima bo‘lishini maydonda ko‘ramiz. Agar oldindan nima bo‘lishini bilganimda, men dunyodagi eng boy inson bo‘lar edim.
Katanesning holati haqida
Katanetsning ahvoli yaxshilanib bormoqda, lekin finalni internet orqali tomosha qiladi.
Final o‘yiniga tayyorlagan rejasi borasida
Aqlli futbol namoyish etishimiz kerak, sababi raqib juda kuchli. Eron terma jamoasiga qarshi qanday o‘ynashni bilamiz. Iroq terma jamoasida ishlayotgan vaqtim Eronga duch kelganmiz.
Eron terma jamoasining taktikasini ko‘rib chiqdik. Qanday uslubda o‘ynashimiz bugun kechasi aniq bo‘ladi, balki uch himoyachi, balki besh nafar himoyachi bilan o‘ynarmiz.
Ikki yil ichida O‘zbekiston terma jamoasining jismoniy holati qanday o‘zgargani haqida
Terma jamoaning o‘yini uch sifat bo‘yicha baholanadi: taktika,texnika va jismoniy holat. Agar har bir jihat yaxshi shakllangan bo‘lsa, terma jamoa yaxshi o‘ynay oladi. Futbolchilarning jismoniy holatini yaxshilash ko‘proq klublarga bog‘liq, sababi futbolchilar o‘z klublarida ko‘p vaqt o‘tkazadi. Terma jamoada futbolchilar bor yo‘g‘i ikki uch hafta bo‘ladi.
Vlado Radmanovich, O‘zbekiston terma jamoasi yordamchi murabbiyi
O‘zbekiston va Eron milliy terma jamoalari o‘rtasidagi o‘yin 20-iyun kuni “Bunyodkor” stadionida bo‘lib o‘tadi. Uchrashuv 20:30 da start oladi. Avvalroq final o‘yinida rossiyalik hakamlar guruhi ishlashi borasida xabar berilgandi.
Qayd etish kerak, Srechko Katanes sog‘lig‘idagi muammolar sabab O‘zbekiston terma jamoasi ishtirokidagi o‘yinlarni o‘tkazib yubormoqda.
Izoh (0)