Ўзбекистон миллий терма жамоаси ёрдамчи мураббийи Владо Радманович CAFA Nations Cup—2023 финали доирасида ўтадиган Эронга қарши ўйин олдидан ўз фикрлари билан ўртоқлашди.
Ўйин ҳақида
Икки терма жамоа ҳам финал баҳсига лойиқ эди. Эрон терма жамоаси ўз гуруҳида камроқ учрашув ўтказди ва шу сабабдан улар тикланиш учун кўпроқ вақтга эга бўлди. Эрон кучли терма жамоа, лекин биз рақибдан чўчимаймиз. Эроннинг ҳужум чизиғи жуда кучли, бизнинг ҳужумчилар ҳам улардан қолишмайди. Учрашувда авваламбор ақлли ўйин намойиш этишимиз керак. Қизиқ ўйин бўлишига ишончим комил. Майдонда жанг бўлиши аниқ.
Эрон терма жамоасидан қандай ўйин кутаётгани борасида
Эрон терма жамоасининг ўйинларини таҳлил қилиб чиқдик. Рақиб ҳақида барча маълумотга эгамиз, лекин Эрон ҳам биз ҳақимизда кўп маълумотга эга. Эрондан ҳужумкор ўйин кутяпман, уларнинг ҳужумкор ўйини бизга имкониятлар яратади.
Эронга қарши ўйинларда дарвоза томон зарба бериш қийинлиги ҳақида
Футболда барчасини кичик деталлар ҳал қилади. Эрон каби терма жамоаларга қарши ўйнаш ҳар доим қийин. Учрашувда рақиб хатоларидан унумли фойдаланишимиз керак.
Имкониятларни 60/40 баҳолагани борасида
Фикрим ўзгармади. Ўйин натижасини тахмин қила олмайман, нима бўлишини майдонда кўрамиз. Агар олдиндан нима бўлишини билганимда, мен дунёдаги энг бой инсон бўлар эдим.
Катанецнинг ҳолати ҳақида
Катанецнинг аҳволи яхшиланиб бормоқда, лекин финални интернет орқали томоша қилади.
Финал ўйинига тайёрлаган режаси борасида
Ақлли футбол намойиш этишимиз керак, сабаби рақиб жуда кучли. Эрон терма жамоасига қарши қандай ўйнашни биламиз. Ироқ терма жамоасида ишлаётган вақтим Эронга дуч келганмиз.
Эрон терма жамоасининг тактикасини кўриб чиқдик. Қандай услубда ўйнашимиз бугун кечаси аниқ бўлади, балки уч ҳимоячи, балки беш нафар ҳимоячи билан ўйнармиз.
Икки йил ичида Ўзбекистон терма жамоасининг жисмоний ҳолати қандай ўзгаргани ҳақида
Терма жамоанинг ўйини уч сифат бўйича баҳоланади: тактика,техника ва жисмоний ҳолат. Агар ҳар бир жиҳат яхши шаклланган бўлса, терма жамоа яхши ўйнай олади. Футболчиларнинг жисмоний ҳолатини яхшилаш кўпроқ клубларга боғлиқ, сабаби футболчилар ўз клубларида кўп вақт ўтказади. Терма жамоада футболчилар бор йўғи икки уч ҳафта бўлади.
Владо Радманович, Ўзбекистон терма жамоаси ёрдамчи мураббийи
Ўзбекистон ва Эрон миллий терма жамоалари ўртасидаги ўйин 20 июнь куни “Бунёдкор” стадионида бўлиб ўтади. Учрашув 20:30 да старт олади. Аввалроқ финал ўйинида россиялик ҳакамлар гуруҳи ишлаши борасида хабар берилганди.
Қайд этиш керак, Сречко Катанец соғлиғидаги муаммолар сабаб Ўзбекистон терма жамоаси иштирокидаги ўйинларни ўтказиб юбормоқда.
Изоҳ (0)