Argentina terma jamoasi hujumchisi Lionel Messi mamlakat terma jamoasidagi yutuqlari va faoliyati yakunlanib borayotgani haqida gapirdi. Shuningdek, terma jamoa ustozi Lionel Skaloni Argentina sardorining futboldagi muhim o‘rni haqida fikr bildirdi.
Terma jamoa safida to‘p surish men uchun ulkan sharaf. Bu ishni ulkan ishtiyoq bilan amalga oshirganman. Ha, qiyin pallalar ham bo‘lgan, shubhalar paydo bo‘lgan vaqtda terma jamoa safida ortiq o‘ynamasligimni ham aytgandim. Fikrimni o‘zgartirganim va qaytganimdan, shundan keyin muvaffaqiyatga erishganimdan xursandman, albatta.
Klub miqyosida va individual jihatdan barchasiga ega chiqdim, biroq terma jamoa safida bu narsa yetishmayotgandi va Argentinaning g‘alabasi muhim ekanini bilardim. Barchasini yutgan holda faoliyatimning oxiriga kelayotganimdan zavqlanyapman.
Lionel Messi, futbolchi
Argentina terma jamoasi bosh murabbiyi Messini almashtira oladigan futbolchi yo‘qligini aytdi.
Ertaga Messining o‘rnini kim bosadi? Hech kim. Messini hech kim almashtira olmaydi, biroq Leoning o‘rnini bosib bo‘lmasligini anglagan holda jamoaning o‘yini o‘sha-o‘sha qolishini ta’minlashga harakat qilamiz. Terma jamoa boshqa usullarni qo‘llagan holda shunday yaxshi o‘yin ko‘rsata olishga qodir.
Futbol olami Messi abadiy o‘ynashini xohlaydi, biroq qaysidir vaqt u nafaqat Argentina terma jamoasi, balki futbol bilan xayrlashadi. O‘sha kun barcha uchun qayg‘uli bo‘ladi.
Lionel Skaloni, Argentina terma jamoasi bosh murabbiyi
Avvalroq Messi Qatarda o‘tgan mundial uning uchun oxirgisi bo‘lgani va JCH—2026 da ishtirok etmasligini aytib o‘tgandi.
Messi 2022/23-yilgi mavsum yakunida “PSJ”ni erkin agent maqomida tark etib, “Inter Mayami” bilan shartnoma imzoladi.
Messi Argentina terma jamoasida...
- Eng ko‘p o‘yin o‘tkazgan futbolchi
- Eng yaxshi to‘purar va assistent
- Eng yoshi katta gol muallifi
- JCHlarda eng ko‘p o‘yin o‘tkazgan futbolchi
- JCHda eng yosh gol muallifi
Izoh (0)